سوڭعى كۇندەرى قورعا تاعى 40،8 ملرد تەڭگە تۇسكەن.
2022 جىلدىڭ 16 قاڭتارى مەن 28 قاڭتارى ارالىعىندا قور شوتتارىنا بارلىعى 93،3 ملرد تەڭگە اۋدارىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بولجامدىق ەسەپتەرگە سايكەس، قور جىلىنا كەمىندە 100 ملرد تەڭگە كولەمىندە قاراجات جيناقتايدى. الدىن الا ەسەپتەۋلەر شەتەلدىك جانە حالىقارالىق كومپانيالاردان قاراجات الۋدى كوزدەمەيدى.
28 قاڭتاردا «قازاقستان حالقىنا» قورى شوتتارىنا قاراجات اۋدارعاندار:
- «ERG كومەك» كورپوراتيۆتى قورى – 30 ملرد تەڭگە؛
- «حالىق» قايىرىمدىلىق قورى - 10 ملرد تەڭگە؛
- سۋلەيمەنوۆ دياس تۋلەۋتايەۆيچ – 450 ملن تەڭگە؛
- «بانك سەنتر كرەديت» اق - 200 ملن تەڭگە؛
- «كولىكتىك سەرۆيس ورتالىعى» اق - 150 ملن تەڭگە.
قور باسشىلىعى الىنعان بارلىق قاراجاتتىڭ تولىق اشىقتىعى مەن ەسەپتىلىگى قامتاماسىز ەتىلەتىنىن مالىمدەيدى.
اقشا قازاقستان حالقىنىڭ يگىلىگىنە، دەنساۋلىق ساقتاۋ، الەۋمەتتىك سالا، ءبىلىم، مادەنيەت جانە سپورت پروبلەمالارىن شەشۋگە باعىتتالادى.
««قازاقستان حالقىنا» قوعامدىق قورى مەملەكەت باسشىسى قاسىم-جومارت توقايەۆتىڭ دەنساۋلىق ساقتاۋ، ءبىلىم بەرۋ، الەۋمەتتىك سالا، مادەنيەت جانە سپورت سالالارىنداعى ناقتى ماسەلەلەردى شەشۋ جونىندەگى باستاماسىن قولداعان بارلىق قازاقستاندىقتارعا، ءىرى كاسىپورىندارعا، ەڭبەك ۇجىمدارىنا العىس بىلدىرەدى»، - دەلىنگەن قوردىڭ باسپا ءسوز قىزمەتى تاراتقان حابارلامادا.