الماتى وڭىرلىك كوممۋنيكاسيالار قىزمەتىنىڭ ونلاين-بريفينگىندە قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا مەگاپوليستەگى ەپيدەميولوگيالىق احۋال تاۋلىگىنە 1900-2300 جاعداي دەڭگەيىندە تۇراقتالعانىن ايتتى، دەپ حابارلايدى اlmaty-akshamy.kz.
سپيكەر كۆي دەرتىنىڭ الدىڭعى اپتاداعى 13 508 جاعدايدان وتكەن اپتادا 14 213 جاعدايعا دەيىن وسكەنىن اتاپ ءوتتى. باسقاشا ايتقاندا، كۆي ىندەتىنىڭ بەسىنشى تولقىنى وتكەن اپتادا ءوسۋىن جالعاستىردى.
«ءبىراق 27 قاڭتاردان باستاپ تۇراقتانۋ ءۇردىسى تىركەلدى. جالپى، الماتى تۇرعىندارىنا جاۋاپكەرشىلىك تانىتقانى ءۇشىن العىس ايتقىم كەلەدى، ويتكەنى ءبىر اپتا ىشىندە قايتا ۆاكسينالانعانداردىڭ سانى 42 مىڭ ادامعا نەمەسە 36%-عا ارتتى. بۇل حالىق اراسىندا يممۋندىق ارالىقتى 56،8%-عا دەيىن ارتتىرۋعا مۇمكىندىك بەردى (ۆاكسينالانعانداردىڭ 52،6%-ى + پاندەميا باستالعاننان بەرى اۋىرعانداردىڭ 4،2%-ى)، بۇل دەرتتىڭ تۇراقتانۋىنا اسەر ەتتى. وسى قارقىندى جالعاستىرا وتىرىپ، ءبىز تەزىرەك «قىزىل» ايماقتان شىعىپ، بۇرىنعى ءومىر اعىسىنا ورالا الامىز»، - دەدى ءا. قالىقوۆا.
ونىڭ ايتۋىنشا، قاڭتار ايىندا دەرتتىڭ ءوسۋى الدىڭعى اپتادان بەرى 40%، ال جىل باسىنان باستاپ 18 ەسە ءوستى.
ونىڭ ۇستىنە، 20-39 جاس ارالىعىنداعى ناۋقاستار سانى ءبىرشاما تومەندەدى - 40%-دان 35%-عا دەيىن. وسىلاردان سوڭ 40-59 جاستاعى (26%)، 60 جاستان اسقان (22%) ادامدار ءجيى اۋىرادى.
«وتكەن اپتادا 14 جاسقا دەيىنگى بالالار اراسىندا جۇقتىرۋدىڭ ايتارلىقتاي ءوسۋى تىركەلدى - 5،4%-عا (1 463-تەن 1 920-عا دەيىن) جانە جاسوسپىرىمدەر – 1%-عا (388-دەن 589-عا دەيىن)، سونداي-اق 60 جاستان اسقان ادامدار-3%-عا (2 530-دان 3 262-گە دەيىن). ءبىر جاسقا دەيىنگى بالالار اراسىندا، كەرىسىنشە، 450-دەن 438 جاعدايعا دەيىن، ءسال تومەندەگەنى بايقالادى، ءبىراق ولاردىڭ ۇلەسى بارلىق بالالار اراسىندا ايتارلىقتاي – 22،8%»، - دەپ اتاپ ءوتتى سپيكەر.