تولەمدەر رەسمي ءتىزىم نەگىزىندە جۇزەگە اسىرىلادى
«قازاقستان حالقىنا» قوعامدىق قورى ءىىم، ۇلتتىق قاۋىپسىزدىك كوميتەتى قىزمەتشىلەرى جانە قورعانىس مينيسترلىگى سونىمەن بىرگە ۇلتتىق ۇلاننىڭ اسكەري قىزمەتشىلەرىنە كومەك رەتىندە ماتەريالدىق تولەم تولەي باستادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ونىڭ ىشىندە قازا تاپقان 19 قىزمەتكەر مەن اۋىر جاراقات العان 106 ادامنىڭ وتباسى مۇشەلەرى بار. تولەمدەر جوعارىدا اتالعان مەملەكەتتىك ورگانداردان الىنعان رەسمي ءتىزىم نەگىزىندە جۇزەگە اسىرىلادى. بۇل ساناتتاعى جابىرلەنۋشىلەرگە ارنالعان تولەمنىڭ جالپى سوماسى - 451 ميلليون تەڭگە. ەسكە سالايىق، بۇعان دەيىن قامقورشىلىق كەڭەس قور باسقارماسىنا قازا تاپقان جانە اۋىر جارالانعان اسكەري قىزمەتكەرلەردىڭ وتباسىلارىنا، ىشكى ىستەر جانە ۇلتتىق قاۋىپسىزدىك ورگاندارى قىزمەتكەرلەرىنە بەلگىلەنگەن سومالاردى تولەۋدى تاپسىرعان بولاتىن. سونداي-اق، كەڭەسكە ادام قۇقىقتارى جانە بالا قۇقىقتارى جونىندەگى ۋاكىلدەردىڭ قورعا ۇسىنعان تىزىمدەرىنەن كەزدەيسوق زارداپ شەككەن ازاماتتاردىڭ ءولىمىنىڭ ءمان-جايىن قۇزىرلى ورگاندارمەن بىرلەسىپ پىسىقتاۋ تاپسىرىلدى. قور ۋاكىلەتتى مەملەكەتتىك ورگانداردان ءتيىستى رەسمي مالىمەتتەر العاننان كەيىن وسى ساناتتاعى قازا بولعانداردىڭ تۋىستارىنا تولەمدەردى جۇرگىزۋدى باستايدى.