بيىل قازاقستان حالقى اسسامبلەياسى (قحا) ءوزىنىڭ 30 جىلدىق مەرەيتويىن اتاپ وتۋدە. وسىعان وراي الماتىداعى وڭىرلىك كوممۋنيكاسيالار قىزمەتىندە قحا مۇشەلەرىنىڭ قاتىسۋىمەن بريفينگ ءوتتى. جيىندا مادەني ورتالىقتاردىڭ ەتنوسارالىق كەلىسىمدى نىعايتۋداعى ءرولى تالقىلانىپ، مەرەيتويعا ارنالعان ءىس-شارالار جوسپارى تانىستىرىلدى، دەپ حابارلايدى aqshamnews.kz
الماتى قالاسى قحا اقساقالدار كەڭەسى ءتوراعاسىنىڭ ورىنباسارى بولات وسپانوۆتىڭ ايتۋىنشا، اسسامبلەيا ءتۇرلى ەتنوستاردىڭ توعىسۋىنا، بىرلىكتىڭ نىعايۋىنا جانە ۇلتتىق بىرەگەيلىكتىڭ دامۋىنا ىقپال ەتتى.
«بەيبىتشىلىك پەن كەلىسىم ساياساتى حالىقتىڭ بىرلىگى – مەملەكەتتىلىكتى قالىپتاستىرۋ، نىعايتۋ جانە دامىتۋداعى نەگىزگى فاكتور ەكەنىن دالەلدەدى. اسسامبلەيا العاشقى جىلدارى ەلدەگى ەتنوستاردىڭ مۇددەسىن قورعاۋ ماقساتىندا قۇرىلسا، بۇگىندە ول بارلىق قازاقستاندىق ەتنوستاردى ءبىرتۇتاس حالىق رەتىندە بىرىكتىرۋ جولىندا ماڭىزدى جۇمىس اتقارۋدا. بۇل ۇدەرىس ازاماتتىق قاعيداتتارعا، ورتاق ماقساتتار مەن مىندەتتەرگە، سونداي-اق بىرىكتىرۋشى قۇندىلىقتارعا نەگىزدەلگەن»، – دەپ اتاپ ءوتتى ب. وسپانوۆ.
سپيكەر سونىمەن قاتار قحا اياسىندا كوپتەگەن باستامالاردىڭ جۇزەگە اسىرىلعانىن ايتتى. ولاردىڭ قاتارىندا انالار كەڭەستەرى، اقساقالدار كەڭەسى، «اسسامبلەيا جاستارى» رەسپۋبليكالىق قوعامدىق بىرلەستىگى، «جومارت جان» قايىرىمدىلىق ورتالىقتارى، مەدياسيا كەڭەستەرى، جاس عالىمدار كلۋبى جانە ەلىمىزدىڭ بارلىق وڭىرلەرىندە جۇمىس ىستەيتىن 34 دوستىق ءۇيى بار. بۇل ازاماتتىق ينستيتۋتتار ەلدەگى ەتنوسارالىق كەلىسىم مەن الەۋمەتتىك بىرلىكتى نىعايتۋدا ماڭىزدى ءرول اتقارىپ، مىڭنان استام ەتنومادەني بىرلەستىكتى ورتاق ىسكە جۇمىلدىردى.
قحا قىزمەتىندە قايىرىمدىلىق ەرەكشە ورىن الادى. ونىڭ جارقىن مىسالدارىنىڭ ءبىرى – «جۇرەكتەن – جۇرەككە» جوباسى. وسى باستاما اياسىندا سۋ تاسقىنىنان زارداپ شەككەن وڭىرلەرگە 1700 توننادان استام گۋمانيتارلىق كومەك جەتكىزىلدى. جالپى كومەكتىڭ كولەمى 805 ميلليون تەڭگەدەن استى، ال بۇل باستاماعا 12 مىڭنان استام قحا ەرىكتىسى قاتىستى.
«قازاقستان ۇيعىرلارىنىڭ رەسپۋبليكالىق مادەني ورتالىعى» قوعامدىق بىرلەستىگىنىڭ ءتوراعاسى ابدۋلحاليل دولكۋنتاي ءوز سوزىندە ۇيىمنىڭ ەڭ ماڭىزدى جەتىستىكتەرىنىڭ ءبىرى – ەلدەگى بەيبىتشىلىكتى ساقتاۋ ەكەنىن اتاپ ءوتتى. بۇل تۇراقتىلىق ەكونوميكالىق، مادەني جانە الەۋمەتتىك سالالاردىڭ دامۋىنىڭ نەگىزى بولىپ تابىلادى.
«بۇگىندە مەملەكەتتىك ءتىل بارلىق ەتنوستاردى بىرىكتىرەتىن فاكتورعا اينالدى، بۇعان قازاقستان حالقى اسسامبلەياسى ايتارلىقتاي ۇلەس قوستى. مەملەكەت اسسامبلەيا ارقىلى ەتنوستاردىڭ ءتىلى مەن مادەنيەتىن دامىتۋعا قولايلى جاعداي جاسادى. اسسامبلەيا بۇكىل قازاقستاندىق قوعامدى دامىتۋ ارقىلى جالپىمەملەكەتتىك مىندەتتەردى ورىندايدى»، – دەپ ايتتى ول.
بريفينگكە سونداي-اق پروفەسسور، تاريح عىلىمدارىنىڭ كانديداتى، الماتى قالاسى قحا مۇشەسى مەندىگانىم شايمەردەنوۆا قاتىستى. ول ءوز سوزىندە قحا جانىنداعى عىلىمي-ساراپتامالىق كەڭەس پەن عىلىمي-ساراپتامالىق توپتاردىڭ قىزمەتى تۋرالى ايتتى.
«قحا عىلىمي-ساراپتامالىق كەڭەستەرى قازاقستاننىڭ بارلىق دەرلىك ءىرى قالالارىندا جۇمىس ىستەيدى. ءبىز ەتنوسارالىق جانە كونفەسسياارالىق ءوزارا ءىس-قيمىل ماسەلەلەرىن تالقىلاپ، عىلىمي ماقالالاردىڭ تۇساۋكەسەرى، ەلىمىزدىڭ دامۋىنا ەلەۋلى ۇلەس قوسقان كورنەكتى قايراتكەرلەرگە ارنالعان حالىقارالىق كونفەرەنسيالار وتكىزەمىز. كونفەرەنسيا جيناقتارى مەن مونوگرافيالارى دايىندالىپ، ولاردى وقۋ ورىندارى مەن ەتنومادەني بىرلەستىكتەر اراسىندا تاراتامىز»، – دەپ اتاپ ءوتتى ول.
سونداي-اق سپيكەر اقپان ايىندا بەلگىلى تۇركىتانۋشى ەرلان ەسپەنبەتوۆتىڭ قاتىسۋىمەن جاستاردى قازاقستاننىڭ مادەنيەتى مەن سالت-داستۇرىمەن تانىستىرۋعا باعىتتالعان ءىرى عىلىمي سەمينار وتكىزۋ جوسپارلانعانىن ايتتى.
الماتىدا اسسامبلەيانىڭ مەرەيتويىن مەرەكەلەۋ اياسىندا بارلىعى 400-دەن استام ءتۇرلى ءىس-شارالار، سونىڭ ىشىندە رەسپۋبليكالىق جانە وڭىرلىك فورۋمدار، عىلىمي-تاجىريبەلىك كونفەرەنسيالار، دوڭگەلەك ۇستەلدەر، ەتنومادەني فەستيۆالدەر مەن قايىرىمدىلىق اكسيالارى، شىعارماشىلىق كەشتەر، سپورتتىق تۋرنيرلەر جانە ت.ب. جوسپارلانعان. قازاقستاندىق بىرەگەيلىكتى نىعايتۋعا جانە مادەنيەتتى دامىتۋعا ىقپال ەتەتىن جوبالارعا ەرەكشە نازار اۋدارىلادى.