بۇل مامانداردىڭ 2050 جىلعا جاساعان بولجامى.
«ەڭبەك رەسۋرستارىن دامىتۋ ورتالىعى» اق بولجامداۋ دەپارتامەنتىنىڭ ساراپشىلارى تۋۋ، ءولىم جانە كوشى-قون كورسەتكىشتەرىنىڭ نەگىزىندە دەموگرافيالىق بولجام دايىندادى، دەپ حابارلايدى Almaty-akshamy.kz
تالداۋعا سايكەس، قازاقستان حالقىنىڭ سانى 2030 جىلعا قاراي 20،8 ملن-نان 21،5 ملن-عا دەيىن، ال 2050 جىلعا قاراي 23،5 ملن-نان 27،7 ملن-عا دەيىن جەتۋى مۇمكىن ەكەن.
«بۇل رەتتە، ەگەر ءولىم مەن تۋۋ كورسەتكىشتەرى 2021 جىلعى دەڭگەيدە، ال سىرتقى جانە ءوڭىرارالىق كوشى-قون 2017-2021 جىلدارداعى ورتاشا ماندە ساقتالسا، قازاقستان حالقىنىڭ سانى 2030 جىلعا قاراي 20 ملن 958 مىڭ ادامعا، ال 2050 جىلعا قاراي 27 ملن 192 مىڭ ادامعا جەتەدى»، – دەپ اتاپ ءوتتى ەردو بولجامداۋ دەپارتامەنتىنىڭ ديرەكتورى دميتريي شۋمەكوۆ.
ونىڭ مالىمەتىنشە، 2030 جىلعا قاراي، ورتالىق سەناريي بويىنشا، حالىق سانى نۇر-سۇلتان قالاسىندا 420 مىڭ ادامعا نەمەسە 33%-عا، 1،7 ملن ادامعا دەيىن، الماتى قالاسىندا 414 مىڭ ادامعا نەمەسە 20%-عا، 2 ملن 466 مىڭ ادامعا دەيىن، شىمكەنت قالاسىندا 369 مىڭ ادامعا نەمەسە 32%-عا، 1،5 ملن ادامعا دەيىن وسەدى.
بۇدان باسقا، تۇركىستان وبلىسىندا حالىق سانى 207 مىڭ ادامعا، ماڭعىستاۋ وبلىسىندا 170 مىڭ ادامعا، الماتى وبلىسىندا 145 مىڭ ادامعا كوبەيەدى. شىعىس قازاقستان، قوستاناي، سولتۇستىك قازاقستان، قاراعاندى، پاۆلودار جانە اقمولا وبلىستارىندا حالىق سانىنىڭ قىسقارۋى مۇمكىن.
2050 جىلعا قاراي، ەردو ساراپشىلارىنىڭ ەسەپتەرىنە سايكەس، بولجامنىڭ ورتالىق نۇسقاسىن الىپ قارايتىن بولساق، ءوسۋ بويىنشا شىمكەنت قالاسى كوش باستايتىن بولادى، وندا حالىق سانى 1 ملن 679 مىڭ ادامعا ارتىپ، 2،8 ملن ادامعا جەتەدى نەمەسە 2022 جىلمەن سالىستىرعاندا 2،5 ەسەگە ارتادى. نۇر-سۇلتان قالاسىندا ءوسىم 1 ملن 634 مىڭ ادامدى قۇرايدى، بۇل 2،3 ەسە وسىمگە، 2،9 ملن ادامنىڭ كورسەتكىشىنە سايكەس كەلەدى. الماتى قالاسىندا تۇرعىندار سانى 3،5 ملن ادامعا دەيىن نەمەسە 1،4 ملن ادامعا (2022 جىلعا قاراي+69%) وسەدى. ماڭعىستاۋ وبلىسىندا حالىق سانى 820 مىڭ ادامعا وسەدى، سونىڭ سالدارىنان وڭىردەگى حالىق سانى 1 ملن 571 مىڭ ادامدى قۇرايدى.
«ءبىزدىڭ بولجامىمىز بەن بۇۇ ەكونوميكالىق جانە الەۋمەتتىك ماسەلەلەر جونىندەگى دەپارتامەنتىنىڭ جاڭا دەموگرافيالىق بولجامى ۇقساس جانە سەنارييگە بايلانىستى حالىق سانىنىڭ 2030 جىلعا قاراي 20،8 ملن-نان 21،5 ملن ادامعا دەيىن، ال 2050 جىلعا قاراي 23،5 ملن-نان 27،7 ملن-عا دەيىن ءوسۋىن بولجايدى»، – دەپ ءبولىستى دميتريي شۋمەكوۆ.