كۇدىكتى ۇرلاعان كولىكتەرىمەن جول اپاتىنا ۇشىراعان.
الماتىدا وتكەن تۇندە ەكى جەڭىل اۆتوماشيناسى مەن "جەدەل جاردەم" كولىگىن ۇرلاعان ەر ادام ۇستالدى، دەپ حابارلايدى Almaty-akshamy.kz
الماتى پوليسيا دەپارتامەنتىنىڭ حابارلاۋىنشا، قۇلجا تراكتىسىندەگى تۇرعىن ءۇي كەشەنىنىڭ اۋماعىنان BMW ماركالى اۆتوكولىكتى ايداپ اكەتۋ تۋرالى العاشقى حابارلاما پوليسياعا 21.45-تە تۇسكەن. اۋلادان شىققان ۇرى Audi-مەن سوقتىعىسىپ، وقيعا ورنىنان قاشىپ كەتكەن.
ول ۇرلانعان كولىكپەن الماتى وبلىسى ەڭبەكشىقازاق اۋدانىنىڭ ەسىك قالاسىنا جەتىپ، قارسى باعىتقا شىعىپ، Toyota اۆتوكولىگىمەن سوقتىعىسقان. الايدا ۇرى وقيعا ورنىنان ءىزىن سۋىتقان. سودان كەيىن ول 28 جاستاعى قىزدان Nissan كولىگىن كۇشپەن تارتىپ الىپ، تاس جولدا اۋدارىلعان. كۋاگەرلەر "جەدەل جاردەم" شاقىرعان كەزدە، ەر ادام "جەدەل جاردەمنىڭ" كولىگىن دە ايداپ كەتكەن.
«كۋاگەرلەر "جەدەل جاردەم" شاقىردى. ال ۇرى مەديسينالىق بريگادا كولىگىن دە ايداپ كەتتى. ول وبلىستىق "جەدەل جاردەم" ستانسياسىنا تيەسىلى Jac Sunray-مەن قالاعا كىرگەندە، بىردەن پاترۋلدىك پوليسيا ەكيپاجى ۇستادى»، - دەپ ناقتىلادى الماتى پوليسياسى.
مەديسينالىق كۋالاندىرۋ 1994 جىلى تۋعان كۇدىكتىنىڭ ەسىرتكى قابىلداعانىن كورسەتتى. ءقازىر ول قاماۋدا وتىر. پوليسيا ۇرلىق فاكتىسى بويىنشا بىردەن ءۇش قىلمىستىق ءىس قوزعادى.