بەرليندە اي-تي-بي دەپ اتالاتىن الەمدەگى ەڭ ءىرى تۋريستىك جارمەڭكە باستالدى.
اۋقىمدى شاراعا قازاقستان دا قاتىسىپ جاتىر. وتاندىق تۋريزم كومپانياسى ۇيىمداستىرعان ۇلتتىق ستەندتە، ەۋروپالىقتارعا، ەلىمىزدەگى كورىكتى جەرلەر مەن باعىتتار ۇسىنىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
بەرليندە الەمدەگى ەڭ ءىرى تۋريستىك جارمەڭكە اشىلدى. باستاۋىن 1966 جىلدان الاتىن بۇل شارا ىندەت باستالعالى العاش رەت ۇيىمداستىرىلىپ وتىر. وعان الەمنىڭ 180 ەلىنەن كەلگەن تۋريزم يندۋسترياسىنىڭ جەتەكشى وكىلدەرى قاتىسىپ جاتىر. اراسىندا قازاقستاندىق قاتىسۋشىلار دا بار. كەلۋشىلەر نازارىنا كيىز ءۇي جيھازدارى مەن بۇيىمدارى، قىمىزدان جاسالعان بالمۇزداق سەكىلدى تاعامدار ۇسىنىلعان.
«گەرمانيا تۇرعىندارى ءۇشىن، جالپى ەۋرووداق ەلدەرى ءۇشىن ۆيزاسىز رەجيم قولدانىلادى. گەرمانيادان قازاقستاننىڭ بىرنەشە قالاسىنا تىكەلەي رەيستەر اشىلعان. جالپى ءبىز ەۋروپالىق جيھانكەزدەر ءۇشىن - ورتالىق ازياداعى تۋريستىك باعىتتىڭ ءبىرى سانالامىز. قازاقستان شەتەلدىكتەرگە وتە قىزىق. اسىرەسە ۇلتتىق ساياباق جاعىنان. ويتكەنى ءبىزدىڭ ەلدە 14 ۇلتتىق ساياباق بار»، - دەيدى «Kazakh Tourism» ۇك» اق جىلىتۋ دەپارتامەنتىنىڭ ديرەكتورى شىرىن مۋسينا.
بەرلينگە ەل اتىنان 20-عا جۋىق تۋريستىك كومپانيا بارعان. ءبارىنىڭ ماقساتى ءبىر – ىسكەرلىك بايلانىس ورناتىپ، شەتەلدىك تۋريستەردى كوپتەپ قازاقستانعا تارتۋ. جالپى نەمىستەر ساياحاتتى جانى سۇيەتىن حالىق سانالادى. جيھان كەزۋگە قوماقتى قارجى جۇمساۋعا ءاردايىم دايىن. ستاتيستيكاعا سۇيەنسەك، 2021 جىلدىڭ قاراشاسى مەن 2022 جىلدىڭ قازان ايى ارالىعىندا ولار تۋريستىك جولداماعا 25 ميلليارد ەۋرو جۇمساعان. وسى رەتتە ساراپشىلار قازاقستاننىڭ ەۋروپالىق تۋريستەردى وزىنە تارتۋعا الەۋەتى زور دەيدى.
«قازاقستاندا بىرنەشە رەت بولدىم. الماتى مەن استانا قالالارىن جاقسى بىلەم. مەنىڭ ويىمشا، مۇنداي شارالارعا قاتىسىپ، ءوز مۇمكىندىكتەرىڭىزدى كورسەتۋ وتە ماڭىزدى. سىزدەردىڭ ەل قىستا تاۋ-شاڭعى شيپاجايلارىنا بارۋعا، جازدا حايكينگپەن اينالىسۋعا بولاتىندىعىمەن تارتىمدى. ءبىراق بۇل رەتتە ءۇندىستان مەن جۇڭگو تۋريستەرىن ۇمىتپاعان ابزال. ويتكەنى ولار سىزدەرگە جاقىنىراق. قازاقستان ءاردايىم الەمدەگى ەڭ ابىرويلى تۋريستىك جارمەڭكەلەرگە قاتىسىپ كەلەدى»، - تۋريزم سالاسىنداعى ساراپشى ۆولفگانگ مايەرحوفەر.
الداعى ۋاقىتتا ءوز ەلىمىزدىڭ الەۋەتىن ەۋروپانىڭ باسقا دا قالالارىندا سونىمەن قاتار دۋباي مەن گونكونگتا كورسەتۋ جوسپاردا بار.