قازاقستاندا ازىرلەنگەن ماتەريال جولدامۇزدىڭ پايدا بولۋىنىڭ الدىن الادى، اسفالتتى بۇزبايدى جانە ەكولوگياعا زيان كەلتىرمەيدى.
قازاقستان جول عىلىمي-زەرتتەۋ ينستيتۋتىنىڭ عالىمدارى استانادا ءوتىپ جاتقان جول كورمەسىندە جاقىندا پاتەنتتەلگەن كوكتايعاققا قارسى ماتەريالدىڭ تۇساۋكەسەرىن وتكىزدى، دەپ حابارلايدى Almaty-akshamy.kz.
اتالعان ماتەريالدىڭ باستى ەرەكشەلىگى – تومەن تەمپەراتۋرانىڭ كەڭ دياپازونىندا مۇزدى ەرىتۋ قابىلەتى، ياعني 0-دەن -30°C-قا دەيىن.
سونىمەن قاتار قۇرامىنداعى كالسيي ءوز كەزەگىندە بەتون جابىندارىنىڭ بەرىكتىگىن نىعايتادى جانە ولاردىڭ بەتىن قابىرشاقتانۋدان قورعايدى، ال فوسفور جول بويىنداعى جاسىل كەڭىستىكتەرگە جاعىمدى اسەر ەتەدى.
ونەرتابىس اۆتورلارىنىڭ ايتۋىنشا، اتالعان جاڭاشىلدىقتىڭ مۇزعا قارسى باسقا سۇيىقتىقتاردان ايىرماشىلىعى – جاڭا رەاگەنت فورمۋلاسىندا جولداردى بۇزاتىن، وسىمدىكتەردى كەرى اسەر ەتەتىن جانە كولىككە زاقىم كەلتىرەتىن ناتريي ءحلوريدى، ياعني قاراپايىم تۇز جوق.
«ءبىز -10°C دەيىن جاقسى جۇمىس ىستەيتىن كوكتايعاققا قارسى شەتەلدىك تەحنولوگيالار مۇزدى جارتىلاي عانا ەرىتەتىنىن جانە تەمپەراتۋرانىڭ ودان ءارى تومەندەۋىمەن ەرىگەن سۋ قايتادان قاتىپ قالاتىنىن بايقادىق. بۇل ءوز كەزەگىندە كوكتايعاققا اكەپ سوعادى. بۇل ماسەلەنى تۇبەگەيلى شەشۋ ءۇشىن ءبىز كوكتايعاققا قارسى جاڭا ماتەريال ازىرلەدىك. ونىڭ قۇرامى مۇزدى تەز ەرىتەدى جانە ونىڭ -30°C دەيىن ورنىعۋىنا جول بەرمەيدى. ماتەريالدىڭ تيىمدىلىگى مەن ارتىقشىلىقتارىن كورىپ، تانىسقىسى كەلەتىندەردى ينستيتۋت زەرتحاناسىندا شاقىرامىز»، دەيدى «قازجولعز» اق باسپا ءسوز قىزمەتىنىڭ وكىلدەرى.
تاجىريبەلىك ۋچاسكەدە سىناقتان وتكەننەن كەيىن عىلىمي ينستيتۋت ينۆەستورلاردى تارتۋدى جانە كوكتايعاققا قارسى جاڭا قۇرالدىڭ ءوندىرىسىن ىسكە قوسۋدى جوسپارلاپ وتىر.