قازاقستان فۋتبولىنىڭ مۋزەيى اشىلدى

ءىس-شاراعا «استانا» فۋتبول ورتالىعىنىڭ تاربيەلەنۋشىلەرى، قازاق فۋتبولىنىڭ ارداگەرلەرى، وتاندىق فۋتبول كلۋبتارىنىڭ جەتەكشىلەرى، قازاقستان ۇلتتىق قۇراماسىنىڭ باس باپكەرى ماگومەد ادييەۆ، سونداي-اق ۇلتتىق قۇراما ويىنشىلارى باۋىرجان يسلامحان مەن يان ۆوروگوۆسكيي قاتىستى، دەپ حابارلايدى Almaty-akshamy.kz.

مۋزەيدى قۇرۋعا اتسالىسقان ۇجىم 1913 جىلى سەمەيدە باستاۋ العان قازاقستان فۋتبولىنىڭ تاريحىن جاڭعىرتۋ ءۇشىن ەلىمىزدىڭ تۇكپىر-تۇكپىرىنەن جادىگەرلەر، دەرەكتەر جانە اقپارات جيناۋ جۇمىستارىن جۇرگىزدى.

وسى وقيعاعا وراي قازاقستان فۋتبول فەدەراسياسىنا فيفا جانە ۋەفا-دان قۇتتىقتاۋ حاتتارى كەلىپ ءتۇستى.

«بىرنەشە اي بۇرىن مەن سىزدەردىڭ ادەمى ەلدەرىڭىزگە بارىپ، قازاقستاندا فۋتبولعا دەگەن كەرەمەت قۇشتارلىق پەن سۇيىسپەنشىلىكتى ءوز كوزىممەن كورۋ مۇمكىندىگىنە يە بولدىم. مۋزەي ەلدەگى فۋتبولدىڭ 110 جىلدىق تاريحىنا، ىستەرگە، تۇلعالارعا، سونداي-اق سپورتىمىزدى دامىتىپ جاتقان بارلىق ادامدارعا قۇرمەت كورسەتۋگە ءوز ۇلەسىن قوساتىنى ءسوزسىز»،  - دەدى فيفا پرەزيدەنتى دجانني ينفانتينو.

«قازاقستان فۋتبول فەدەراسياسىن مۋزەيدىڭ رەسمي اشىلۋىمەن قۇتتىقتاعىم كەلەدى. وسىنداي ماڭىزدى وقيعالار ۇلتتىق قاۋىمداستىقتىڭ دۇرىس باعىتتا دامىپ، ۋەفا-عا مۇشە قاۋىمداستىقتار اراسىندا بەدەلگە يە بولعانىنىڭ دالەلى بولدى. سىزدەردىڭ ۋەفا كلۋبتىق جارىستارىنا قاتىسۋلارىڭىز جانە ۇلتتىق قۇرامانىڭ جەتىستىكتەرى قاۋىمداستىقتىڭ بارلىق دەڭگەيدەگى پروگرەسسىن كورسەتەدى، ال الداعى ۋاقىتتا ەۋروپالىق فۋتبولدا ودان ءارى تولىق باسەكەگە تۇسۋگە مۇمكىندىكتەرىڭىز بار. قفف-عا تابىس تىلەيمىن، ويتكەنى سىزدەر بۇل دارەجەگە جەتۋ ءۇشىن ۇزاق جولدان وتتىڭىزدەر جانە قازىرگى تابىستارىڭىز – فۋتبولمەن ءومىر سۇرەتىن جانە فۋتبولدى جاقسى كورەتىندەرگە ارنالعان»، - دەدى ۋەفا پرەزيدەنتڭ الەكساندر چەفەرين. 

قازاقستان فۋتبولى مۋزەيىنىڭ اشىلۋىنا وراي ادىلەت بارمەنقۇلوۆ حالىقارالىق سپورت ءباسپاسوزى قاۋىمداستىعىنىڭ (AIPS) العىس حاتىمەن ماراپاتتالدى.

سونداي-اق سالتاناتتى شارادا قازاقستان فۋتبول مۋزەيىنىڭ ەكسپوناتتارىن جاساۋ مەن تولىقتىرۋعا زور ۇلەس قوسقاندارعا قفف پرەزيدەنتىنىڭ العىس حاتى تابىستالدى:

– سەگىزبايەۆا ايگۇل تيمۋر قىزى – كورنەكتى فۋتبولشى، جاتتىقتىرۋشى تيمۋر سانجار ۇلى سەگىزبايەۆتىڭ قىزى. ايگۇل تيمۋر قىزى اكەسىنىڭ جەكە زاتتارىن مۋزەي قورىنا سىيعا تارتتى.

– ءالىم ءىلياس ۇلى اناپيانوۆ – سپورت ءجۋرناليسى، سپورت تاقىربىندا 6 كىتاپتىڭ اۆتورى. ول مۋزەي قورىنا كوپتەگەن ادەبيەت پەن باسقا دا جادىگەرلەردى سىيعا تارتتى.

– ستانيسلاۆ سەرىك ۇلى سارسەكوۆ – سپورت تاريحشىسى، شولۋشى، جۋرناليست. ول مۋزەي قورىنا ءوزىنىڭ جەكە كوللەكسياسىنان 150-دەن استام جادىگەردى سىيعا تارتتى.

– نازگۇل نۇرجان قىزى كادريمبەتوۆا – ەڭبەك سىڭىرگەن مادەنيەت قايراتكەرى، PhD دوكتورى.

– ءاسىلحان نۇفتوللا ۇلى ماشتايەۆ، قازاقستان رەسپۋبليكاسى ۇلتتىق مۋزەيىنىڭ، «استانا ارەنا» ستاديونىنىڭ جانە ەلىمىزدىڭ باسقا دا ماڭىزدى مادەنيەت جانە سپورت نىساندارىنىڭ ديزاينىن جاساۋعا قاتىسقان مۋزەي ديزاينەرى.

قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆتىڭ باستاماسىمەن اشىلعان مۋزەيدە قازاقستان فۋتبولىنىڭ تاريحى، ونىڭ ىشىندە اتى اڭىزعا اينالعان ويىنشىلاردىڭ جەتىستىكتەرى مەن ەلىمىزدەگى فۋتبولدىڭ دامۋىنداعى ماڭىزدى ساتتەرى كورسەتىلەدى.

ايتا كەتەيىك، مۋزەي قورىنا كەز كەلگەن ادام فۋتبولىمىزدىڭ تاريحىنا قاتىستى جادىگەرلەردى سىيعا تارتا الادى.

مۋزەي جۇمىس كۇندەرى ساعات 10:00-دەن 17:00-گە دەيىن جۇمىس ىستەيدى.