يرينا يۋنۋسمەتوۆا پاريج وليمپياداسىنىڭ ليسەنزياسىنا قول جەتكىزدى
حالىقارالىق نىسانا كوزدەۋ فەدەراسياسى (ISSF) بۇگىنگى كۇنى بارلىق الەم كۋبوگى كەزەڭدەرىنەن كەيىن جاڭارتىلعان وليمپيادالىق رەيتينگىن جاريالادى. وسى رەيتينگ ناتيجەسىندە يرينا يۋنۋسمەتوۆا پاريج وليمپياداسىنىڭ ليسەنزياسىنا يە بولدى.
ۇلتتىق قۇراما سپورتشىسى 10 مەتردەن تاپانشامەن نىسانا كوزدەۋ ساناتىندا قايتا ۇلەستىرۋ كەزەڭىندە جولداماعا يەلىك ەتتى. بۇل قازاقستاننىڭ سپورتتىق اتۋ فەدەراسياسى ءۇشىن ۇلكەن جەتىستىك، سەبەبى بۇل 9-شى وليمپيادالىق ليسەنزيا.
بۇعان دەيىن يسلام ساتپايەۆ، كونستانتين مالينوۆسكيي، الەكساندرا لە، ارينا التۋحوۆا، نيكيتا چيريۋكين (نىسانا كوزدەۋ)؛ اسەم ورىنباي، ەدۋارد ەششەنكو جانە ماريا دميتريەنكو (ستەند اتۋ) پاريجگە باراتىن ليسەنزياعا يە بولعان ەدى. وسى قاتاردا اسەم ورىنباي مەن يرينا يۋنۋسمەتوۆانىڭ ليسەنزياسى جەكە سپورتشىنىڭ وزىنە تيەسىلى بولسا، قالعاندارى فەدەراسيانىڭ كۆوتاسى بولىپ تابىلادى.
جالپى العاندا، قازاقستاننىڭ ەنشىسىندەگى وليمپيادالىق ليسەنزيا سانى 67-گە جەتتى.