قازاقستان ەكونوميكاسى ءوندىرىستىڭ پاندەمياعا دەيىنگى دەڭگەيىنە جەتتى

بۇل تۋرالى حالىقارالىق ۆاليۋتا قورىنىڭ ميسسيا باسشىسى مالىمدەدى

نيكوليا بلانشەنىڭ ايتۋىنشا، قازاقستان سەنىمدى تۇردە قالپىنا كەلتىرۋ سەرپىنىن كورسەتۋدى جالعاستىرۋدا. ول سونداي-اق رەسپۋبليكانىڭ قارجىلىق قاداعالاۋدى كۇشەيتۋ، ينفلياسيالىق تارگەتتەۋ، سالىقتىق جانە بيۋدجەتتىك اكىمشىلەندىرۋدى سيفرلاندىرۋ جونىندەگى شارالارىنا جانە 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى مىندەتتەمەلەرىنە جوعارى باعا بەردى، دەپ حابارلايدى Almaty-akshamy.kz

سونىمەن قاتار ساراپشى ەلدەگى ينفلياسيا ءالى دە ءوسۋى مۇمكىن ەكەنىن اتاپ ءوتتى. سوندىقتان ول ۇلتتىق بانكتىڭ اقشا-نەسيە ساياساتىن قاتاڭداتۋدى ورىندى دەپ ەسەپتەيدى.

«قازاقستان ۇلتتىق بانكى الدىن بازالىق مولشەرلەمەنى 0،25% كوتەردى. ەلدەگى جاعدايدى تالداي وتىرىپ، بۇل ساياساتتى جالعاستىرۋ قاجەت دەپ سانايمىز. سەبەبى ينفلياسيا دەڭگەيى ءالى دە وسۋدە. سونداي-اق ۇلتتىق بانكتىڭ ەكونوميكانى قولداۋدىڭ مەملەكەتتىك باعدارلامالارىنان شىعۋ باستاماسىن قولدايمىز. ەلدەگى قارجى نارىعىن رەتتەۋ مەن دامىتۋ، باسەكەلەستىكتى قورعاۋ اگەنتتىگىن قۇرۋ ەل ەكونوميكاسىنىڭ دۇرىس دامۋىنا سەرپىن بەرەدى دەپ ويلايمىز. 2021 جىلدىڭ قورىتىندىسى بويىنشا قالپىنا كەلۋ سەرپىنىن ودان ءارى ساقتاي وتىرىپ، قازاقستان ەكونوميكاسىنىڭ ءوسۋ قارقىنى 3،7% جەتەدى»، - حۆق-نىڭ قازاقستان بويىنشا ميسسيا باسشىسى نيكوليا بلانشە.