پرەزيدەنتتىڭ اۋىل شارۋاشىلىعىنىڭ جالپى ءونىم كولەمىن ەكى ەسەلەۋ جونىندەگى تاپسىرماسىن ورىنداۋعا ارنالعان جول كارتاسى اياسىندا اۋىل شارۋاشىلىعى مينيسترلىگى ەگىس القاپتارىن ءارتاراپتاندىرۋ شارالارىن كۇشەيتىپ جاتىر.
2025 جىلى ەلىمىزدەگى جالپى ەگىس كولەمى 322،8 مىڭ گا-عا ارتىپ، 23،6 ملن گا-عا جەتتى (2024 جىلى – 23،3 ملن گا)، دەپ حابارلايدى aqshamnews.kz.
سونىڭ ىشىندە ءداندى جانە ءداندى-بۇرشاقتى داقىلدار القابى 630 مىڭ گا-عا ازايىپ، 16 ملن گا-نى قۇرادى، ال بيداي ەگىستىگى 884،6 مىڭ گا-عا قىسقارىپ، 12،3 ملن گا بولدى.
بوساتىلعان جەرلەر اناعۇرلىم تابىستى داقىلدارعا بەرىلدى. كۇنباعىس رەكوردتىق 1،8 ملن گا اۋماقتا ەگىلدى – بۇل وتكەن جىلمەن سالىستىرعاندا 481،5 مىڭ گا ارتىق. كارتوپ ەگىستىگى دە ءوسىم كورسەتىپ وتىر: كولەمى 9،3 مىڭ گا-عا ارتىپ، 131،2 مىڭ گا-عا جەتتى. ونىڭ ىشىندە ۇيىمداسقان شارۋاشىلىقتارداعى ءوسىم 12،5 مىڭ گا قۇراپ، 84،5 مىڭ گا-عا جەتتى.
سونىمەن قاتار سۋارمالى داقىلدار القابى ازايتىلۋدا. 2025 جىلى ماقتا 144،5 مىڭ گا جەرگە ەگىلدى، ونىڭ ىشىندە 50 مىڭ گا تامشىلاتىپ سۋارۋمەن قامتىلعان. قىزىلوردا وبلىسىندا كۇرىش القابى 85،6 مىڭ گا-دان 80،9 مىڭ گا-عا دەيىن قىسقاردى.
ەگىستى ءارتاراپتاندىرۋ ىشكى ازىق-تۇلىك بالانسىن نىعايتۋعا، جەكەلەگەن داقىلدارعا تاۋەلدىلىكتى ازايتۋعا، اگروونەركاسىپتىك كەشەننىڭ تۇراقتىلىعىن جانە فەرمەرلەردىڭ تابىسىن ارتتىرۋعا مۇمكىندىك بەرەدى. ال جەر رەسۋرستارىن نەعۇرلىم ۇتىمدى پايدالانۋ ەلدىڭ ازىق-تۇلىك قاۋىپسىزدىگىنىڭ نەگىزىنە اينالۋعا ءتيىس.