قازاقستان دزيۋدودان بەدەلدى حالىقارالىق تۋرنير Grand Slam وتكىزۋ قۇقىعىنا يە بولدى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
قازاقستان دزيۋدو فەدەراسياسىنىڭ پرەزيدەنتى قۋانىشبەك ەسەكەيەۆ پەن حالىقارالىق دزيۋدو فەدەراسياسىنىڭ (IJF) پرەزيدەنتى ماريۋس ۆيزەر قازاقستاندا Grand Slam الەمدىك ءتۋرنيرىن وتكىزۋ تۋرالى ءتورت جىلدىق كەلىسىمشارتقا قول قويدى.
اتالعان كەلىسىمشارتقا سايكەس، قازاقستان 2023 جىلدان 2026 جىلعا دەيىن دزيۋدودان ەڭ بەدەلدى حالىقارالىق تۋرنيرلەردىڭ ءبىرىن وتكىزەتىن باستى الاڭعا اينالادى. بەدەلدى الەمدىك تۋرنيرلەردىڭ ءبىرى ەكسكليۋزيۆتى اتاۋعا يە بولدى، الەمدىك الامان دودا «Qazaqstan barysy Grand Slam» دەپ اتالاتىن بولدى.
قازاقستانداعى تۋرنيردە دزيۋدوشىلار 2024 جىلى پاريجدە جانە 2028 جىلى لوس-اندجەلەستە وتەتىن جازعى وليمپيادا ويىندارىنا قاتىسۋ ءۇشىن ۇپاي جينايدى. سونىمەن قاتار، جارىس اياقتالعاننان كەيىن دزيۋدودان حالىقارالىق وقۋ-جاتتىعۋ لاگەرى تۇراقتى نەگىزدە وتكىزىلەتىن بولادى.
قول قويۋ ءراسىمى كەزىندە حالىقارالىق دزيۋدو فەدەراسياسىنىڭ (IJF) پرەزيدەنتى ماريۋس ۆيزەر، IJF ءۇشىن ءتۋرنيردى وتكىزۋ قۇقىعىن كوپتەگەن تالانتتى سپورتشىلاردى باپتاپ شىعارعان جانە سپورت سۇيەر قاۋىمى مەن جانكۇيەرلەرى كوپ ەلگە بەرۋ ۇلكەن مارتەبە ەكەنىن ايتتى. «قازاقستاندىق دزيۋدونىڭ تاريحى تەرەڭ، سونىمەن قاتار مۇندا كوپتەگەن ءىرى تۋرنيرلەر وتكىزىلىپ كەلدى. بۇل ەلدە Grand Slam ءتۋرنيرىن وتكىزۋ دزيۋدونى دامىتۋعا دا، ونى تانىمال ەتۋگە دە جاڭا سەرپىن بەرەتىنىنە سەنىمدىمىن»، - دەپ اتاپ ءوتتى ۆيزەر مىرزا.
ال دزيۋدو فەدەراسياسىنىڭ پرەزيدەنتى قۋانىشبەك ەسەكەيەۆ ەلىمىزدىڭ 2023 جىلدان 2026 جىلعا دەيىن Grand Slam وتكىزۋ قۇقىعىن الۋى دزيۋدو فەدەراسياسىنىڭ وراسان زور جەتىستىگى جانە حالىقارالىق تۋرنيرلەردە قازاقستان تۋىن اسقاقتاتىپ، لايىقتى ونەر كورسەتەتىن بارلىق سپورتشىلاردىڭ ورتاق ەڭبەگى ەكەنىن اتاپ ءوتتى.
«قازاقستاننىڭ دزيۋدودان ءىرى جارىستاردى وتكىزۋدە ايتارلىقتاي تاجىريبەسى بار ەكەنىن ءتۇسىنۋ ماڭىزدى – ءبىزدىڭ ەلىمىزدە گران-پري جارىستارى، «Masters» ءتۋرنيرى، ەرلەر مەن ايەلدەر اراسىنداعى الەم چەمپيوناتى، بىرنەشە رەت ازيا چەمپيوناتى، سونداي-اق كادەتتەر اراسىنداعى الەم چەمپيوناتى تۇراقتى تۇردە وتكىزىلىپ كەلەدى. ەڭ باستىسى، ءبىزدىڭ دزيۋدوشىلار جوعارى سپورتتىق جەتىستىكتەرىن كورسەتە بىلەتىن، الەمدىك ارەناداعى ۇزدىكتەردىڭ ءبىرى بولىپ سانالادى»، - دەپ اتاپ ءوتتى ق.ەسەكەيەۆ.
ايتا كەتۋ كەرەك، پاريجدەگى Grand Slam-دا قازاقستاندىق دزيۋدوشىلار ەكى مەدال جەڭىپ الدى. وسىلايشا، ايەلدەر اراسىندا 48 كەلىگە دەيىنگى سالماق دارەجەسىندە ونەر كورسەتكەن ءابيبا اباجۋكىنوۆا Grand Slam-دا قولا مەدال جەڭىپ الدى.