التى اي كولەمىندە تىيىم سالۋ ۇسىنىلعان.
دەنساۋلىق ساقتاۋ مينيسترلىگى «اشىق نقا» پورتالىندا قازاقستاننان تىسقارى اكەتۋگە تىيىم سالىناتىن دارىلەردىڭ ساناتى بەلگىلەنگەن بۇيرىقتىڭ جوباسىن تالقىلاۋعا شىعاردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇيرىقتىڭ جوباسى بويىنشا، قازاقستان اۋماعىنان كەز كەلگەن نىسانداعى دارىلىك زاتتاردى، ونىڭ ىشىندە فارماسيەۆتيكالىق سۋبستانسيالاردى، مەديسينالىق بۇيىمداردى، سونداي-اق ولاردى وندىرۋگە ارنالعان ماتەريالدار مەن جيناقتاۋىشتاردى اكەتۋگە 6 اي كولەمىندە تىيىم سالۋ ۇسىنىلعان.
دەگەنمەن، دارى-دارمەكتىڭ بىرنەشە ساناتىنا بۇل قۇجاتتىڭ تالابى جۇرمەيتىنى ايتىلعان. ولار:
- قازاقستاننىڭ اۋماعى ارقىلى وتەتىن ترانزيتتىك تاۋارلار؛
- جەكە تاپسىرىستار بويىنشا تەك جەكە پايدالانۋعا ارنالعان مەديسينالىق بۇيىمدار؛
- حالىقارالىق ىزگىلىك كومەك كورسەتۋگە ارنالعان تاۋارلار؛
- بولشەك ساۋدادا وتكىزۋ شەڭبەرىندە جەكە پايدالانۋ ءۇشىن اكەلىنگەن جانە ساتىپ الىنعان تاۋارلار؛
- تەگىن مەديسينالىق كومەكتىڭ كەپىلدىك بەرىلگەن كولەمى جانە ءمامس شەڭبەرىندە الىنعان دارىلەر؛
- وتكىزۋ قۇقىعىنسىز كورمەلەر وتكىزۋگە ارنالعان ۇلگىلەر؛ - زەرتتەۋلەر مەن سىناقتار جۇرگىزۋگە ارنالعان ۇلگىلەر؛
- دەنساۋلىق ساقتاۋ ۇيىمدارىندا دايىندالىپ، قولدانىلعان راديوفارماسيەۆتيكالىق پرەپاراتتار؛
- مەملەكەتتىك تىركەۋ كەزىندە ساراپتاما جۇرگىزۋگە ارنالعان ۇلگىلەر؛
- پاسيەنتتىڭ نەمەسە ونىڭ دونوردىڭ اۋتولوگيالىق بيوماتەريالدارىن پايدالانا وتىرىپ قابىلداناتىن، جەكە قولدانۋعا ارنالعان الدىڭعى قاتارلى تەراپيا دارىلەرى؛
- ەاەو كەدەندىك اۋماعىنا كەلگەن كولىك قۇرالدارىنىڭ جولاۋشىلارى مەن ەكيپاج مۇشەلەرىن ەمدەۋگە ارنالعان دارى-دارمەكتەر؛
- حالىقارالىق مادەني، سپورتتىق ءىس-شارالارعا قاتىسۋشىلاردى جانە حالىقارالىق ەكسپەديسيالارعا قاتىسۋشىلاردى ەمدەۋگە ارنالعان دارى-دارمەكتەر؛
- قازاقستان تاۋار وندىرۋشىلەرى وندىرگەن، ولارعا قاتىستى تىيىم سالىنعان «ست-1» نىسانىنداعى تاۋاردىڭ شىعۋ تەگى تۋرالى سەرتيفيكاتپەن سۇيەمەلدەنەتىن دارى-دارمەكتەر.
قۇجات كوپشىلىكتىڭ تالقىلاۋىنا 6 ساۋىرگە دەيىن ۇسىنىلماق.