«قازاقستاننىڭ دامۋ بانكى» اق باسقارما ءتوراعاسى رۋسلان يسكاكوۆتىڭ وكىلەتتىگى مەرزىمىنەن بۇرىن توقتاتىلدى، دەپ حابارلايدى Almaty-akshamy.kz اتالعان قارجى ۇيىمىنىڭ باسپا ءسوز قىزمەتىنە سىلتەمە جاساپ.
«26 قازاندا «قازاقستاننىڭ دامۋ بانكى» اق جالعىز اكسيونەرى «بايتەرەك» ۇلتتىق باسقارۋشى حولدينگى ءوز قالاۋى بويىنشا بانكتەن كەتۋ تۋرالى شەشىم قابىلداعان باسقارما ءتوراعاسى يسكاكوۆ رۋسلان ۆيكتوروۆيچتىڭ وكىلەتتىگىن مەرزىمىنەن بۇرىن توقتاتتى»، - دەلىنگەن حابارلامادا.
رۋسلان يسكاكوۆ قدب باسقارما ءتوراعاسى لاۋازىمىن 2022 جىلدىڭ اقپان ايىنان باستاپ اتقاردى. ونىڭ بانك باسشىسى رەتىندەگى قىزمەتى بارىسىندا نەگىزگى بيزنەس-پروسەستەردى رەفورمالاۋ بويىنشا جۇمىس جۇرگىزىلدى، قدب-نىڭ ەلدىك دەڭگەيدەگى حالىقارالىق رەيتينگتەرى راستالدى، $800 ملن استام تىكەلەي شەتەلدىك ينۆەستيسيالار تارتىلدى، ونىڭ ىشىندە ەۋرووبليگاسيالاردىڭ تابىستى شىعارىلۋى ىسكە اسىرىلدى.