جەتىسۋ كومانداسى ەكى رەت «ايبىن» رەسپۋبليكالىق اسكەري-پاتريوتتىق جاستار جيىنىنىڭ جەڭىمپازى اتاندى
«جاس سارباز – قازاقستاننىڭ تىرەگى» فورۋمىندا «جاس سارباز» رەسپۋبليكالىق اسكەري-پاتريوتتىق قوزعالىسىنىڭ جىلدىق قىزمەتىنىڭ قورىتىندىسى شىعارىلدى، دەپ حابارلايدى Almaty-akshamy.kz.
اتالعان شاراعا قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ باستىعى گەنەرال-مايور سەرىك بورامبايەۆ، جەتىسۋ وبلىسى ىشكى ساياسات باسقارماسىنىڭ باسشىسى بولات كەرىمبەك، ۇلتتىق اسكەري-پاتريوتتىق ورتالىقتىڭ باستىعى ارمان اسەنوۆ، «جاس سارباز» رەسپۋبليكالىق اسكەري-پاتريوتتىق قوزعالىسىنىڭ ءتوراعاسى مەيىربەك مەڭدىعالييەۆ، قارۋلى كۇشتەردىڭ ارداگەرلەرى، قوعام قايراتكەرلەرى، جوعارى اسكەري وقۋ ورىندارىنىڭ كۋرسانتتارى مەن وقۋشىلار قاتىستى.
«قارۋلى كۇشتەر قىزمەتىنىڭ ماڭىزدى باعىتتارىنىڭ ءبىرى. ەلىمىزدە جۇمىس ىستەپ جاتقان «جاس سارباز» رەسپۋبليكالىق اسكەري-پاتريوتتىق قوزعالىسى جاس ازاماتتاردىڭ تالانتىن اشۋعا، اسكەري قىزمەت پەن جاۋىنگەرلىك ماماندىققا دەگەن قىزىعۋشىلىعىن ارتتىرۋعا ىقپال ەتەدى»، – دەدى گەنەرال-مايور سەرىك بورامبايەۆ.
فورۋمدا وقۋشىلار مەن كۋرسانتتار «جاس سارباز» قوزعالىسى، ءوز جوبالارى مەن جوسپارلارى تۋرالى ايتىپ بەردى. جەتىسۋ وبلىسى الاكول اۋدانى «جاس سارباز» اسكەري-پاتريوتتىق قوزعالىسى ءبولىمىنىڭ ءتوراعاسى تىلەك قابىلقانوۆ وڭىردەگى بالالار مەن جاسوسپىرىمدەر ءتۋريزمىن دامىتۋعا باعىتتالعان «Patriot» جوباسىن تانىستىردى.
اعايىندى ماليكا مەن ءمادينا جانايداروۆالار ءۇشىن قازاقتىڭ باتىر قىزدارى ءاليا مولداعۇلوۆا، مانشۇك مامەتوۆا جانە حيۋاز دوسپانوۆا ۇلگى تۇتار قاھارماندار. 2021-2022 جىلدارى ولار «ايبىن» رەسپۋبليكالىق اسكەري-پاتريوتتىق جاستار جيىنىندا جۇلدەلى ورىندارعا يە بولدى. بۇگىندە قىزدار ءوز ءومىرىن قارۋلى كۇشتەرمەن بايلانىستىرۋدى جوسپارلاپ وتىر.
«جاس سارباز» قوزعالىسىنىڭ تاربيەلەنۋشىلەرى جايىق جۇماعازى مەن نۇراسىل ءشارىپوۆ تە جەتىستىكتەرگە جەتتى. ولار بەدەلدى حالىقارالىق بايقاۋلار مەن جارىستاردىڭ جەڭىمپاز، جۇلدەگەرى اتاندى.
«جاس سارباز» قوزعالىسىنىڭ ۇيىرمەلەرىندەگى ساباقتار كوپتەگەن بالالارعا بولاشاقتاعى ماماندىعى تۋرالى شەشىم قابىلداۋعا ايتارلىقتاي اسەر ەتۋدە. «ايبىن-2022» رەسپۋبليكالىق جاستار جيىنىنىڭ ءابسوليۋتتى جەڭىمپازى سۇلتان سەرىك ۇلى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتى اتاندى.
ايتا كەتۋ كەرەك، «جاس سارباز» اسكەري-پاتريوتتىق قوزعالىسىنىڭ ءبىرىنشى فيليالى وسى وڭىردە اشىلعان بولاتىن. جەتىسۋ كومانداسى ەكى رەت «ايبىن» رەسپۋبليكالىق اسكەري-پاتريوتتىق جاستار جيىنىنىڭ جەڭىمپازى اتاندى. بيىل «جەتىسۋ تارلاندارى» اسكەري-پاتريوتتىق كلۋبىنىڭ كومانداسى باس جۇلدەنى جەڭىپ الدى.
2022 جىلى جاستارعا اسكەري-پاتريوتتىق تاربيە بەرۋ سالاسىنداعى قىزمەتتىڭ قورىتىندىسى بويىنشا اۋىسپالى «پاتريوتتار مەكەنى» كۋبوگى جەتىسۋلىقتارعا بۇيىردى. كۋبوكتى تۇركىستان وبلىسىنىڭ وكىلدەرى تاپسىردى. اۋىسپالى ماراپاتتىڭ بۇرىنعى يەگەرلەرى جاڭا جەڭىمپازداردى قۇتتىقتاپ، ولارعا اۋقىمدى جوبالار مەن جاستاردى اسكەري-پاتريوتتىق تاربيەلەۋ ىسىندە ساتتىلىك تىلەدى.