رەسپۋبليكا جاھاندىق ۇيىمنىڭ ءرولى مەن بەدەلىن نىعايتۋعا ۇلەس قوسۋدى ءارى قاراي جالعاستىرۋعا نيەتتى.
بۇل تۋرالى قازاقستاننىڭ بۇۇ-عا مۇشە بولۋىنىڭ 30 جىلدىعىنا ارنالعان سالتاناتتى شارادا ەلىمىزدىڭ جەنيەۆاداعى بولىمشەسى مەن باسقا دا حالىقارالىق ۇيىمدار جانىنداعى تۇراقتى وكىلى ەرلان الىمبايەۆ مالىمدەدى، دەپ حابارلايدى Almaty-akshamy.kz
مەرەيتويلىق ءىس-شاراعا قاتىسۋشىلار ورتالىق ازيادا يادرولىق قارۋدان ازات ايماق قۇرۋ، ازياداعى ءوزارا ءىس-قيمىل جانە سەنىم شارالارى جونىندەگى كەڭەستى ودان ءارى ىلگەرىلەتۋ، سونداي-اق سيريا بويىنشا استانا پروسەسى اياسىندا بەيبىت كەلىسسوزدەر جۇرگىزۋ مەن كونفەسسياارالىق ديالوگتى ىنتالاندىرۋ سەكىلدى باستامالارداعى قازاقستاننىڭ ماڭىزدى ءرولىن اتاپ ءوتتى.
«30 جىل ىشىندە قازاقستان بۇۇ-نىڭ بەدەلدى مۇشەسى بولدى. وسى جىلدار ىشىندە كوپجاقتى ىنتىماقتاستىقتىڭ كۇن تارتىبىنە، قارۋسىزدانۋ، تۇراقتى دامۋ ماقساتى ماسەلەلەرىنە كوپ ۇلەس قوستى. قازاقستان – يادرولىق قارۋسىزدانۋ مەن يادرولىق سىناقتارعا تىيىم سالعان نەگىزگى باستاماشىلاردىڭ ءبىرى. قازاقستان اۋماعىندا كوپتەگەن ۇدەرىس بولعانىن دا بىلەمىز. سوندىقتان يادرولىق قارۋدان ءوز ەركىمەن باس تارتقان جانە قارۋسىزدانۋ ماسەلەسى بويىنشا قاجەت شارالاردى قابىلداپ جاتقان مەملەكەت رەتىندە قازاقستاننىڭ ءرولى، ارينە، قاشاندا وتە ماڭىزدى ەكەنىن ايتقىم كەلەدى»، - دەيدى بۇۇ-نىڭ جەنيەۆاداعى بولىمشەسىنىڭ باس ديرەكتورى تاتيانا ۆالوۆايا.
بۇۇ-نىڭ جانە باسقا دا حالىقارالىق ۇيىمداردىڭ جوعارى لاۋازىمدى وكىلدەرى مەن قارۋسىزدانۋ سالاسىنداعى ساراپشىلارى قازاقستاننىڭ حالىقارالىق باستامالارىن قولداۋعا جانە ونىڭ حالىقارالىق ارەناداعى ۇستانىمىن نىعايتۋعا قوسقان ۇلەسى ءۇشىن ەل تاۋەلسىزدىگىنىڭ 30 جىلدىعىنا ارنالعان مەرەكەلىك مەدالمەن ماراپاتتالدى.
سونداي-اق ساراپشىلار مەن ديپلوماتتار قازاقستاننىڭ بۇۇ قاۋىپسىزدىك كەڭەسىندەگى تۇراقتى ەمەس مۇشەلىگى مەن ءتوراعالىعىنىڭ، ادام قۇقىقتارى جونىندەگى كەڭەسىنە مۇشەلىگىنىڭ ناتيجەلەرىنىڭ ماڭىزدىلىعىن اتاپ ءوتتى.