قازاقستان بويىنشا سالەمدەمەلەردىڭ ەڭ اۋقىمدى كولەمى الماتى قالاسىندا. بۇل تۋرالى «قازپوشتا» اق الماتى قالالىق فيليالىنىڭ ديرەكتورى رۇستەم نۇركەن قوعامدىق كوممۋنيكاسيا قىزمەتىندە وتكەن بريفينگتە مالىمدەدى، دەپ حابارلايدى aqshamnews.kz
سپيكەردىڭ ايتۋىنشا، الماتى - قارجىلىق ورتالىق بولىپ سانالادى، ويتكەنى مۇندا بيزنەس تە جاقسى دامىعان. جالپى بيىل 8 ايدىڭ وزىندە 1،1 ميلليونعا جۋىق حات-حابار، 1 ميلليوننان استام سالەمدەمە جولدانعان.
«ءبىز بيزنەس سالاسىمەن تىعىز قارىم-قاتىناستا جۇمىس جۇرگىزىپ جاتىرمىز، سونىڭ ىشىندە بيزنەسكە ءوزىمىزدىڭ فرانچايزينگتىك بولىمشەلەرىمىزدى اشۋعا مۇمكىندىك بەرەمىز. قازىرگى تاڭدا 20-دان استام فرانچايزينگ بولىمشەلەرىمىز بار، سول 20 فرانچايزينگ 8 ايدىڭ توڭىرەگىندە ۇلكەن تابىستارعا جەتۋدە. جىل سوڭىنا دەيىن 40-تىڭ توڭىرەگىنە جەتكىزۋگە جۇمىستانۋدامىز»، — دەدى «قازپوشتا» اق الماتى قالالىق فيليالىنىڭ ديرەكتورى رۇستەم نۇركەن.
ول سونداي-اق، جەرگىلىكتى پوشتا ءىرى كومپانيالارمەن سەرىكتەس ەكەنىن اتاپ ءوتتى.
«ءبىز Ozon، Wildberries، Pinduoduo سەكىلدى ءىرى كومپانيالارمەن سەرىكتەسپىز. وسى كومپانيالارعا تاپسىرىستاردى بەرۋ پۋنكتىن اشتىق: Wildberries - 7، Ozon - 3، Pinduoduo - 30. ەلەكتروندىق كوممەرسيانىڭ قارقىندى دامۋىنا بايلانىستى بۇل نۇكتەلەردى ءارى قاراي كوبەيتەتىن بولامىز»، — دەدى رۇستەم نۇركەن.
الماتى قالالىق پوشتاسى ءبىرقاتار جاڭا جوبالاردى ىسكە اسىرۋدا. سولاردىڭ ءبىرى سوڭعى 2 اپتانىڭ توڭىرەگىندە ىسكە قوسىلعان «ءۇي جانىنداعى دۇكەن» جوباسى. سپيكەردىڭ ايتۋىنشا، بۇل ءاربىر دۇكەندە «قازپوشتانىڭ» سالەمدەمەلەرىن بەرۋگە مۇمكىندىك بەرەدى.
جەرگىلىكتى پوشتا فيليالىنىڭ ديرەكتورى پوشتا قىزمەتىندە اۆتوماتتاندىرىلعان روبوتتاردى پايدالانۋ جوسپارلانىپ وتىرعانىن اتاپ ءوتتى.
«قازىرگى زاماناۋي تەحنولوگيالارعا «قازپوشتا» دا قالىس قالىپ جاتقان جوق. وزىق تەحنولوگيالاردى قولدانامىز، الماتى قالاسىنىڭ سىرتىندا اقپاراتتىق-لوگيستيكالىق ورتالىق جۇمىس جاسايدى. ول قازاقستان بويىنشا سالەمدەمەلەردى سۇرىپتايدى. سول ورىندا ساعاتىنا 10 مىڭ سالەمدەمەنى سۇرىپتايتىن اۆتوماتتاندىرىلعان ماشينانى قۇرۋدى باستادىق، جاقىندا ىسكە قوسىلادى. باسقارما ءتوراعاسىنىڭ باستاماسىمەن جاپون كومپانياسى Toshido-مەن مەموراندۋم جاسالدى، فۋلفيلمەنت قىزمەتتەرىمىزدى تەزدەتۋ ءۇشىن اۆتوماتتاندىرىلعان روبوتتاردى جەتكىزۋ تۋرالى كەلىسىم بار. سول كەلىسىم اياسىندا فۋلفيلمەنت قىزمەتتەردى دامىتاتىن بولامىز»، — دەدى فيليال ديرەكتورى.
سونداي-اق بريفينگ بارىسىندا پوشتا ديرەكتورىنىڭ ورىنباسارى زابۋرينا نادەجدا جۋرناليستەردىڭ «وسال ساناتتاعى ادامدارعا جەڭىلدىك تاريفتەرى بار ما؟» دەگەن سۇراعىنا جاۋاپ بەردى.
«ءيا، ارينە، بىزدە زەينەتكەرلەر مەن ۇوس ارداگەرلەرى ءۇشىن بەلگىلى ءبىر جەڭىلدىكتەر بار، وعان قوسا ولار كەزەكتەن تىس قىزمەت الا الادى. ودان بولەك، كورپوراتيۆتىك كليەنتتەر ءۇشىن دە جەڭىلدىكتەر قاراستىرىلعان»، — دەدى زابۋرينا نادەجدا.
قۇسايىنوۆ بەرىك، «قازپوشتا» اق الماتى قالاسى فيليالى ديرەكتورىنىڭ ورىنباسارى، الماتىلىقتار ەڭ كوپ پايدالاناتىن توپ-3 قىزمەتتى اتادى.
«الماتىلىقتار ەڭ كوپ پايدالاناتىن توپ-3 قىزمەت: ەمس جىلدام جەتكىزۋ، سالەمدەمە جولداۋ جانە ارنايى تاپسىرىسپەن حاتتار»، — دەدى بەرىك قۇسايىنوۆ.
بريفينگ سوڭىندا سپيكەرلەر «قازپوشتا» اق اتىن جامىلىپ جۇرگەن الاياقتاردىڭ كوبەيگەنىنە قاتىستى پىكىر ءبىلدىردى.
«ورتالىق اپپاراتپەن بىرىگىپ، بۇل ماسەلە بويىنشا كۇرەسۋدەمىز. ءار فيليالدا وقىتۋ سەكتورى بار، بۇل سەكتوردا قىزمەتكەرلەر مەن تۇتىنۋشىلارعا الاياقتارعا الدانباۋ جولىن ءتۇسىندىرىپ وتىرادى»، — دەپ قورىتىندىلادى سپيكەرلەر.
ايتا كەتەيىك، 9 قازان — دۇنيەجۇزىلىك پوشتا كۇنى. العاشقى پوشتا بولىمشەسى الماتى قالاسىندا (ۆەرنىي) 1860 جىلدىڭ 24 قازانىندا اشىلعان.