قونايەۆ قالاسىنداعى 35 جاستاعى ايەل گەموگلوبيننىڭ وتە تومەن دەڭگەيىمەن اۋىر جاعدايدا قالالىق كوپبەيىندى اۋرۋحاناعا تۇسكەن.
شۇعىل ەمدەۋگە جاتقىزعاننان كەيىن دارىگەرلەر جاتىردىڭ ۇلكەن ميوماسىن انىقتاپ، حيرۋرگيالىق ارالاسۋدى – لاپاروتوميا مەن كونسەرۆاتيۆتى ميومەكتوميانى ءساتتى جۇرگىزىپ، سالماعى 4 كيلوگرامم ميومانى الىپ تاستادى، دەپ حابارلايدى aqshamnews.kz دەنساۋلىق ساقتاۋ مينيسترلىگىنە سىلتەمە جاساپ.
وپەراسيا كەزىندە اعزانىڭ ءوزىن ساقتاي وتىرىپ، جاتىر ميوماسىنىڭ تۇيىندەرى الىنىپ تاستالادى.
«بۇل دياگنوزدى نەمقۇرايلىلىقپەن قابىلداۋعا بولمايدى، ويتكەنى جاتىر ميوماسى ەڭ كوپ تارالعان گينەكولوگيالىق اۋرۋلاردىڭ ءبىرى بولىپ تابىلادى جانە ۇلكەن مولشەرگە جەتۋى مۇمكىن. سونىمەن قاتار، كلينيكالىق كورىنىس پاسيەنتتىڭ جاسىنا، اۋرۋدىڭ ۇزاقتىعىنا، ىسىكتىڭ ورنالاسۋى مەن مولشەرىنە بايلانىستى جانە جاتىردان قان كەتۋ، انەميا، سوزىلمالى اۋىرسىنۋ سيندرومى، كورشى اعزالاردىڭ قىسىلۋ سيندرومىمەن كورىنۋى مۇمكىن، بۇل كوبىنەسە جاتىر ميوماسىنىڭ كولەمىنىڭ ەداۋىر ۇلعايۋى كەزىندە كەزدەسەدى»، - دەيدى پاسيەنتتىڭ ەمدەۋشى دارىگەرى ابدۋالييەۆا راۋشان بەكجان قىزى.
ايەل قازىرگى ۋاقىتتا ۇيىندە، دارىگەرلەرگە العىسىن بىلدىرۋدە.
جاتىردىڭ قابىنۋ اۋرۋلارى، گورمونالدى بۇزىلۋلار، ابورتتار، ەتەككىردىڭ كەش باستالۋى، ارتىق سالماق، دۇرىس تاماقتانباۋ، جۇرەك-قان تامىرلارى پاتولوگياسى بەيىمدىلىك فاكتورلارى بولۋى مۇمكىن ەكەنىن ايتا كەتكەن ءجون.
كوبىنەسە اۋرۋ بايقالماۋى مۇمكىن. وسىعان بايلانىستى دارىگەرلەر مەزگىل-مەزگىل تەكسەرۋدەن ءوتۋ، جاعىندىلاردى، سونىڭ ىشىندە سيتولوگيانى تاپسىرۋ، سونداي-اق ۋلترادىبىستىق دياگنوستيكادان ءوتۋ قاجەتتىلىگىن ەسكە سالادى. سونداي-اق، دارىگەرلەر جىلىنا كەمىندە ءبىر رەت جامباس، ءسۇت بەزدەرىنىڭ، قالقانشا بەزىنىڭ ۋلترادىبىستىق زەرتتەۋىن جاساپ، گينەكولوگقا قارالۋدى ۇسىنادى.
ەمدەۋگە جاتقىزۋ، وپەراسيا جانە ەمدەۋ مىندەتتى الەۋمەتتىك مەديسينالىق ساقتاندىرۋ قاراجاتىنىڭ ەسەبىنەن جۇرگىزىلدى