قازاقستاندا نەكەگە تۇرۋدىڭ تومەندەۋىنىڭ باسقا فاكتورلارى الەۋمەتتىك-ەكونوميكالىق جانە دەموگرافيالىق جاعداي بولۋى مۇمكىن.
سوڭعى بەس جىلدا قازاقستانداعى نەكەلەسۋ ديناميكاسى شامالى تومەندەدى. 2017 جىلى ەلىمىزدە 141 791 نەكە قيىلسا، ەڭ تومەنگى كورسەتكىش 2020 جىلى – 128 839 نەكە بولىپ تىركەلدى، دەپ حابارلايدى Almaty-akshamy.kz.
بۇل زەرتتەۋ قازاقستاندىق قوعامدىق دامۋ ينستيتۋتىنىڭ ساراپشىلارى ازىرلەگەن «قازاقستاندىق وتباسىلار-2022» ۇلتتىق بايانداماسىندا جاريالانعان. زەرتتەۋدە قازاقستاننىڭ 17 ءوڭىرى جانە 1200 ادام قامتىلعان.
«وڭىرلىك بولىنىستە سوڭعى بەس جىلدا نەكە قيۋ دەڭگەيىنىڭ تومەندەۋى بارلىق وڭىردە ساقتالىپ كەلەدى. الايدا، حالىقتىڭ نەكەلەسۋىنىڭ جالپى تومەندەۋىنە قاراماستان، 2018، 2019، 2020 جانە 2021 جىلدارى الماتى قالاسىندا قازاقستان بويىنشا نەكەلەسۋدىڭ جوعارى دەڭگەيى ساقتالدى. ودان كەيىنگى ورىندا الماتى، تۇركىستان وبلىستارى مەن استانا قالاسى تۇر»، - دەپ جازىلعان ۇلتتىق باياندامادا.
اتالعان وڭىرلەردە حالىقتىڭ نەكە قيۋ كورسەتكىشى سالىستىرمالى تۇردە جوعارى بولىپ قالا بەرەدى. وسىلايشا، جىل سايىن تىركەلگەن نەكەنىڭ جالپى ستاتيستيكاسى بۇل كورسەتكىشتىڭ بىرتىندەپ تومەندەگەنىن كورسەتەدى، ءبىراق بىرنەشە وڭىردە نەكەلەسۋ كورسەتكىشى ءالى دە جوعارى.
2020 جىلعى نەكەلەسۋ كورسەتكىشىنىڭ ەڭ تومەنگى دەڭگەيى COVID-19 پاندەمياسىنىڭ قوعامدىق ومىرگە، حالىقتىڭ نەكەگە تۇرۋىنا اسەر ەتۋىمەن تۇسىندىرىلەدى. بۇل جاعدايدا حالىقتىڭ نەكەگە تۇرۋ كورسەتكىشىنىڭ 7،6%-عا تومەندەۋى لوكداۋن، مەملەكەتتىك قىزمەت كورسەتۋدىڭ باياۋلاۋى جانە ۇيلەنۋ تويلارىن وتكىزۋگە شەكتەۋلەر سياقتى فاكتورلارعا بايلانىستى.
«قازاقستاندا نەكەگە تۇرۋدىڭ تومەندەۋىنىڭ باسقا فاكتورلارى الەۋمەتتىك-ەكونوميكالىق جانە دەموگرافيالىق جاعداي بولۋى مۇمكىن. اۋىلدىق جەرلەردە جۇمىسپەن قامتۋدىڭ تومەن دەڭگەيى جانە حالىق تابىسىنىڭ تومەندىگى سياقتى پروبلەمالار ءالى دە وزەكتى ەكەنىن اتاپ وتكەن ءجون. بۇگىنگى تاڭدا قازاقستاندا 500 ادام جانە ودان دا كوپ ادام تۇراتىن 6،5 مىڭعا جۋىق اۋىل بار، ولاردىڭ كوپشىلىگىندە مەكتەپتەر، فەلدشەرلىك قىزمەتتەر نەمەسە ساپالى، ءقاۋىپسىز اۆتوكولىك جولدارى جوق. وسىنىڭ ءبارى ومىرلىك جاعدايلارىنا قاناعاتتانباۋشىلىقتى تۋدىرادى، سونىڭ سالدارىنان جاستاردىڭ جۇمىس كوبىرەك ۇسىنىلاتىن قالالارعا كوشۋىنە اكەلەدى»، - دەيدى زەرتتەۋ.
ايتا كەتەيىك، قازاقستاندىق وتباسىلار-2022» بايانداماسىنىڭ تولىق نۇسقاسى مىنا سىلتەمەدە قولجەتىمدى.