بۇل - الەۋمەتتىك ماڭىزى بار تەگىن شارا.
16 قىركۇيەكتە ەلدىڭ بارلىق ءىرى قالاسىندا – الماتى، نۇر-سۇلتان، قونايەۆ، اقتوبە، تاراز، تۇركىستان، اقتاۋ، قوستاناي، وسكەمەن، پەتروپاۆل، پاۆلودار، قاراعاندى، بالقاش، ورال، قىزىلوردا، شىمكەنت، اتىراۋ، كوكشەتاۋ، تالدىقورعان قالالارىندا «حالىق زاڭگەرى» جالپىرەسپۋبليكالىق الەۋمەتتىك ماڭىزى بار تەگىن اكسيا باستالادى، دەپ حابارلايدى Almaty-akshamy.kz Baq.kz سىلتەمە جاساپ.
شارانى سىبايلاس جەمقورلىققا قارسى ءىس-قيمىل اگەنتتىگى، Zakon.kz ينتەرنەت-باسىلىمى، «پاراگراف» اقپاراتتىق جۇيەسى، مەملەكەتتىك ورگاندار، بەلگىلى زاڭگەرلەر مەن قۇقىق قورعاۋشىلار ۇيىمداستىرادى.
جوبانىڭ ماقساتى – ازاماتتاردىڭ، اسىرەسە، حالىقتىڭ وسال توپتارىنا: از قامتىلعاندارعا، كوپ بالالى وتباسىلارعا، جالعىزباستى انالار، مۇمكىندىگى شەكتەۋلى جاندار، شاعىن جانە ورتا بيزنەس وكىلدەرى، ستۋدەنتتەر جانە باسقا دا كوپتەگەن ازاماتتاردىڭ قۇقىقتىق ساۋاتىن ارتتىرۋ جانە تەگىن زاڭگەرلىك كومەك كورسەتۋ.
"حالىق زاڭگەرى" اكسياسىنىڭ اۋقىمى كۇن سايىن كەڭەيىپ كەلەدى. وعان ءىرى قالالاردان بولەك باسقا دا ەلدى مەكەندەر – وبلىس ورتالىقتارى، ەلىمىزدىڭ بارلىق وڭىرىندەگى اۋداندار مەن اۋىلدار قوسىلۋعا نيەتتى. بۇل وڭىرلەردە جەرگىلىكتى اتقارۋشى ورگاندار مۇمكىندىگىنشە سول كۇنى ءبىر مەزگىلدە ازاماتتاردى قابىلدايدى.
بۇرىن-سوڭدى بولماعان بىرەگەي «حالىق زاڭگەرى» اكسياسى 2016 جىلى وتكىزىلە باستادى. بۇل يدەيانى ەلىمىزدىڭ بارلىق زاڭگەرلىك قاۋىمى قولدادى. اكسيا قاراپايىم قازاقستاندىقتاردىڭ كوڭىلىنەن شىعىپ، كەيىننەن سۇرانىسقا يە بولعانى سونشا، ۇيىمداستىرۋشىلار ونى جىل سايىن ۇلكەن قالالار مەن وڭىرلەردە وتكىزۋدى ۇيعاردى.
2020-2021 جىلدارى عانا اكسيا ءماجبۇرلى ءۇزىلىس جاسادى. ول كەزدە قازاقستاندا، سونىمەن قاتار بۇكىل الەمدە كوروناۆيرۋس پاندەمياسىنا بايلانىستى كارانتين شارالارى ەنگىزىلدى.
سانيتارلىق-ەپيدەميولوگيالىق جاعداي تۇراقتالعاننان كەيىن ۇيىمداستىرۋشىلار جوبانى قايتا باستاۋ تۋرالى شەشىم قابىلدادى: بۇل جولى اكسيا 16 قىركۇيەك كۇنى ساعات 16.00-دە باستالادى.
«كەز كەلگەن ازامات «حالىق ادۆوكاتى» اكسياسىنا كەلىپ، ءوزىن قىزىقتىراتىن بارلىق قۇقىقتىق ماسەلە مەن داۋ بويىنشا ۇزدىك، كاسىبي دەڭگەيى جوعارى زاڭگەرلەردەن، سونىڭ ىشىندە تاجىريبەلى، بەدەلدى ادۆوكاتتاردان، نوتاريۋستاردان، پروكۋرورلاردان، تەگىن، تولىق كولەمدە قاجەت كومەك پەن كەڭەس الا الادى. كەڭەس بەرۋشىلەر قاتارىندا تەرگەۋشىلەر، سوت ورىنداۋشىلارى، پوليسيا قىزمەتكەرلەرى، كامەلەتكە تولماعاندارمەن جۇمىس ىستەيتىن قىزمەتكەرلەر، ادىلەت، كوشى-قون پوليسياسى، بانك ومبۋدسمەنى، سونىمەن قاتار جاۋاپتى باسشىلىق قىزمەتتەردى اتقاراتىن ۇەۇ جانە مەملەكەتتىك ورگانداردىڭ وكىلدەرى بولادى»، - دەلىنگەن حابارلامادا.
زاڭگەرلەر كەڭەس بەرەدى، ال مەملەكەتتىك ورگاندار ازاماتتاردى قابىلدايدى. ازاماتتاردى قابىلداۋ ۋاقىتى شەكتەلمەيدى، سوڭعى ادام كەلگەنگە دەيىن جالعاسادى.
«حالىق زاڭگەرىنىڭ» قىزمەتىن پايدالانعىسى كەلەتىندەر جىلدان جىلعا كوبەيىپ كەلەدى. تەك 2016-2019 جىلدار ارالىعىندا 100 مىڭنان استام ءوتىنىش بەرۋشى تەگىن زاڭ كومەگىن الدى، 7 مىڭنان استام زاڭگەر مەن مەملەكەتتىك قىزمەتكەرلەر ولاردىڭ سۇراقتارىنا جاۋاپ بەردى.
سۇراقتار ءومىردىڭ ءوزى سياقتى الۋان ءتۇرلى. بىرەۋ ازاماتتىق، بىرەۋ قىلمىستىق ءىس بويىنشا اقىلداسقىسى كەلەدى. بىرەۋ تۇرعىن ءۇي زاڭناماسى، بىرەۋ ەڭبەك، بانك، جەر، سالىق... بىرەۋ وتباسى جانە نەكە قاتىناستارى ماسەلەسى، بىرەۋ مۇراگەرلىك، جىلجىمايتىن مۇلىك، ايىپپۇلدار، نەسيە بەرۋ، كيبەربۋللينگ جانە تاعى باسقا تۋرالى سۇراعىسى كەلەدى. كوبىنە ادامدار قۇقىقتىق جانجال تۋىنداعان جاعدايدا ءوزىن قالاي قورعايتىنىن، نەدەن باستاۋ كەرەك ەكەنىن بىلمەيدى. وسى تۇستا «حالىق زاڭگەرىنىڭ» باعا جەتپەس كومەگى قاجەت.
حالىقتىڭ قامتىلۋى مەن اۋماعى جاعىنان «حالىق زاڭگەرىنىڭ» قازاقستاندا عانا ەمەس، الەمدە تەڭدەسى جوق. قازاقستان – «حالىق زاڭگەرى» سياقتى بىرەگەي اۋقىمدى اكسيا دۇنيەگە كەلگەن جانە ودان ءارى قارقىن الىپ كەلە جاتقان العاشقى جانە جالعىز مەملەكەت. بۇكىل حالىققا ءبىر مەزگىلدە تەگىن زاڭگەرلىك كەڭەس بەرۋ ەشبىر ەلدە بولعان ەمەس.
بۇل جوبا شىنىمەن دە ەلدە جالپىحالىقتىق سيپاتقا جانە جالپىۇلتتىق، مەملەكەتتىك مانگە يە بولدى.
«حالىق زاڭگەرى» قۇقىقتىق دەموكراتيالىق مەملەكەتىمىزدىڭ، ورتاق ءۇيىمىزدىڭ دامۋىنا ۇلەس قوسىپ كەلەدى. مۇندا زاڭنىڭ ۇستەمدىگى، ازاماتتاردىڭ قۇقىعى مەن بوستاندىعىن ساقتاۋ ءابسوليۋتتى باسىمدىققا اينالۋعا ءتيىس.