ق ر پرەمەر-مينيسترى ءاليحان سمايىلوۆ ۇكىمەت وتىرىسى بارىسىندا جەم-شوپپەن قامتاماسىز ەتۋ جانە ەگىن وراعى ناۋقانىنا دايىندىق تۋرالى تاپسىرمالار بەردى.
اۋىل شارۋاشىلىعى ءمينيسترى ەربول قاراشوكەيەۆ اۋىل شارۋاشىلىعى جانۋارلارىن ازىقپەن قامتاماسىز ەتۋ جۇمىستارى اياسىندا جەم-شوپ داقىلدارىنىڭ ەگىس الاڭدارى 448،1 مىڭ گەكتارعا ۇلعايتىلعانىن حابارلادى، جەم-شوپ ساتىپ الۋدى سۋبسيديالاۋعا قاراجات ءبولىندى، جەم-شوپ استىعىن ساتىپ الۋ ءۇشىن ازىق-تۇلىك كورپوراسياسىنىڭ جارعىلىق كاپيتالى ۇلعايتىلدى، 1 قازانعا دەيىن ق ر اۋماعىنان بيداي شىعارۋعا كۆوتالاردىڭ قولدانىسى ۇزارتىلدى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
بۇدان باسقا، ءاربىر ءوڭىر بويىنشا جۇيەلى شارالاردى قامتيتىن ازىق ءوندىرىسى سالاسىن دامىتۋ جونىندەگى 2022-2025 جىلدارعا ارنالعان جول كارتاسى ازىرلەنىپ، بەكىتىلدى.
سونداي-اق مينيستر رەسپۋبليكانىڭ بارلىق وڭىرىندە جاپپاي ەگىن جيناۋ باستالعانىن ايتتى. بۇگىندە بارلىعى 2،2 ملن گا ءداندى جانە ءداندى-بۇرشاقتى داقىلدار (13،9%) جينالدى، ورتاشا ونىمدىلىك 14،6 س/گا جاعدايىندا 3،3 ملن توننا استىق باستىرىلدى. بيىل اۋىل شارۋاشىلىعى داقىلدارى جينالعان الاڭ 23،4 ملن گەكتاردى قۇرادى، بۇل 2021 جىلمەن سالىستىرعاندا 387،1 مىڭ گەكتارعا ارتىق.
اۋىسپالى قالدىقتاردى ەسكەرە وتىرىپ، جالپى استىق جيناۋدان كۇتىلەتىن كولەم رەسپۋبليكانىڭ ىشكى قاجەتتىلىگىن تولىق قامتاماسىز ەتۋ، سونداي-اق استىقتىڭ بەلگىلى ءبىر كولەمىن ەكسپورتقا وتكىزۋ جانە ءداستۇرلى نارىقتارداعى ساۋدا پوزيسيالارىن ساقتاۋ ءۇشىن جەتكىلىكتى.
ەنەرگەتيكا ءمينيسترى بولات اقشولاقوۆتىڭ مالىمەتىنشە، بيىل كۇزگى دالا جۇمىستارىنا 423،5 مىڭ توننا ديزەل وتىنى ءبولىندى. شىلدەدە 106،6 مىڭ توننا تيەلدى، تامىزدا 148،2 مىڭ تونناعا تولەنىپ، 87،4 مىڭ توننا تيەلدى.
اۋىل شارۋاشىلىعى تاۋارىن وندىرۋشىلەرگە مۇناي وڭدەۋ زاۋىتتارىنان ديزەل وتىنىن جەتكىزۋ باسىم نەگىزدە جۇزەگە اسىرىلادى. ولاردىڭ باعالارى وڭىرگە بايلانىستى بولشەك ساۋدا باعاسىنان 15-25% تومەن.
بايانداماشىلاردى تىڭداپ بولعان پرەمەر-مينيستر جالپى بيىل مال ازىعىن دايىنداۋ جۇمىستارى ءۇشىن اۋا رايىنىڭ قولايلى بولىپ تۇرعانىن ايتتى. دەگەنمەن ماڭعىستاۋ جانە اتىراۋ وبلىستارى گرافيكتەن كەشىگىپ كەلەدى.
«بۇل وڭىرلەر جۇمىس قارقىنىن كۇشەيتۋى كەرەك»، —دەدى ءاليحان سمايىلوۆ.
پرەمەر-مينيستر ۇكىمەتتىڭ ەگىن وراعىن قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق قاجەتتى شارالاردى قابىلداعانىن ايتىپ ءوتتى.
«بيىلعى بولجام بويىنشا، استىقتىڭ ءتۇسىمى ورتاشا جىلدىق كورسەتكىشتەن جوعارى بولۋى كەرەك. وسىعان بايلانىستى اۋىل شارۋاشىلىعى مينيسترلىگى مەن اكىمدىكتەردىڭ باستى مىندەتى – ەگىن وراعىن ۋاقىتىندا جانە ساپالى وتكىزۋ»، — دەدى ءاليحان سمايىلوۆ. سونداي-اق ۇكىمەت باسشىسى ەليەۆاتورلاردىڭ استىقتى قابىلداۋعا جانە ساقتاۋعا دايىن بولۋىن قامتاماسىز ەتۋ كەرەكتىگىن ايتتى.
سونىمەن قاتار اۋىل شارۋاشىلىعى، يندۋستريا جانە ينفراقۇرىلىمدىق دامۋ مينيسترلىكتەرى مەن «قازاقستان تەمىر جولى» ۇلتتىق كومپانياسىنا ءوڭىر اكىمدىكتەرىمەن بىرلەسىپ، ۆاگوندارمەن قامتاماسىز ەتۋ جانە لوگيستيكا ماسەلەسىن شەشۋ جۇمىستارىن جۇرگىزۋ تاپسىرىلدى.
ۇكىمەت باسشىسى اۋىل شارۋاشىلىعى مينيسترلىگىنە ازىق-تۇلىك كەلىسىمشارت كورپوراسياسىمەن بىرلەسىپ، قىس مەزگىلىنە جەم-شوپ قورىن ۋاقىتىلى جاساقتاۋ شارالارىن قابىلداۋ ءارى ولاردىڭ باعاسىنىڭ تۇراقتى بولۋىن قامتاماسىز ەتۋدى تاپسىردى.
ءاليحان سمايىلوۆ ديزەل وتىنىمەن قامتاماسىز ەتۋ ماسەلەلەرىنە ەرەكشە نازار اۋداردى. وسى جۇمىس اياسىندا پرەمەر-مينيستردىڭ ءبىرىنشى ورىنباسارى رومان سكليارعا جانار-جاعارمايدىڭ باعالارىن باقىلاۋ جانە تاپشىلىعىنا جول بەرمەۋ جونىندەگى تۇراقتى جۇمىس ىستەيتىن كوميسسيا قۇرۋ تاپسىرىلدى.
«ۇلتتىق ەكونوميكا مينيسترلىگى باسەكەلەستىكتى قورعاۋ جانە دامىتۋ اگەنتتىگىمەن جانە اكىمدىكتەرمەن بىرلەسىپ، باعا نەگىزسىز كوتەرىلگەن جاعدايدا ءتيىستى دەن قويۋ شارالارىن قابىلداۋى كەرەك. يندۋستريا جانە ينفراقۇرىلىمدىق دامۋ مينيسترلىگى، “قازمۇنايگاز” جانە قتج كومپانيالارى مۇناي وڭدەۋ زاۋىتتارىنان مۇناي ونىمدەرىن ۋاقىتىلى جىبەرۋدى قامتاماسىز ەتۋ بويىنشا شارالار قابىلداۋى قاجەت»، — دەدى ءاليحان سمايىلوۆ.
سونىمەن قاتار سيفرلىق دامۋ، يننوفاسيالار جانە اەروعارىش ونەركاسىبى جانە ەنەرگەتيكا مينيسترلىكتەرىنە ديزەل وتىنىن ساتۋدىڭ تاۋلىكتىك ليميتتەرىن باقىلاۋ جونىندەگى اقپاراتتىق جۇيەنى ەنگىزۋدى جەدەلدەتۋ جانە ەنەرگەتيكا مينيسترلىگىنە ءوڭىر اكىمدىكتەرىمەن بىرلەسىپ، ەگىن وراعى كەزىندە شارۋالاردى جانار-جاعارمايمەن ۋاقىتىلى قامتاماسىز ەتۋ ماسەلەسىن تۇراقتى باقىلاۋدا ۇستاۋ تاپسىرىلدى.