الماتىدا №7 قالالىق اۋرۋحانانىڭ قابىلداۋ بولىمشەسىنىڭ مەڭگەرۋشىسى سانيتارعا قول كوتەرگەن.
بۇل تۋرالى اقپارات الەۋمەتتىك جەلىدە تارادى. 19 جاستاعى سانيتار نۇرجان وحانوۆ وسىعان دەيىن دە مەڭگەرۋشىنىڭ ۇرىپ-سوققانىن ايتقان. جابىرلەنۋشىنىڭ ارىپتەستەرى دە مۇنى راستادى، دەپ حابارلايدى Almaty-akshamy.kz Egemen.kz-كە سىلتەمە جاساپ.
«قاتتى سوققىعا جىقتى. قابىلداۋ بولىمىندە ۇرىپ-سوعىپتى. سانيتار باسشىمىزدان قورقىپ، قورعانعان دا جوق»، - دەيدى №7 اۋرۋحانا قىزمەتكەرلەرى.
اقپاراتقا سايكەس، نۇرجان وحانوۆ ساراپتامادان وتكەن. قازىرگى ۋاقىتتا دەنساۋلىعىنا بايلانىستى دەمالىستا. سانيتاردىڭ اتا-اناسى پوليسياعا ارىز جازعان.
بەلگىلى بولعانداي، باس دارىگەر 19 جاستاعى سانيتاردى بۇعان دەيىن دە سوققىعا جىققان، ءبىراق كەيىن ءىس جابىلىپ قالعان. №7 اۋرۋحانا قىزمەتكەرلەرىنىڭ ايتۋىنشا، باسشى سانيتارلاردى ءجيى ۇرادى.
«پسيحولوگيالىق قىسىم جاسايدى، ايقايلايدى. ءبىز ناۋقاستارمەن جۇمىس ىستەيمىز، جۇمىسىمىز اۋىر. ەڭ لاس جۇمىستى سانيتارلار جاسايدى جانە ولار باسشىنىڭ قىسىمىنا شىدايدى. سونىمەن قاتار، باسقا اۋرۋحانالاردىڭ بارلىعى بونۋس الادى، ال ءبىز شەتتە قالامىز. وتكەن مەرەكەلەردىڭ بارىندە ءبىز سىياقى المايمىز، كومەكتەسىڭىزدەر، جاعدايىمىزدى مينيسترلىككە جەتكىزىڭىزدەر»، - دەدى اۋرۋحانا قىزمەتكەرلەرى.
ولار باسشىلىقتىڭ قۋدالاۋىنان قورقاتىندىقتان، ءاتى-جونىن، تەگىن كورسەتپەۋدى ءوتىندى. ولاردىڭ ايتۋىنشا، بۇعان دەيىن جۋرناليستەرگە اشىق شاعىمدانعان قىزمەتكەرلەردىڭ ءبىرى جۇمىستان قۋىلعان.
اقپاراتقا سايكەس، تاعى ءبىر وقيعادان كەيىن سوققىعا جىعىلعان جىگىتتىڭ ارىپتەستەرى جەدەل جاردەم ءبولىمىنىڭ باستىعىنا قاتىستى قىزمەتتىك تەرگەۋ جۇرگىزىلۋ ءۇشىن قول جيناپ جاتىر.
دەگەنمەن، اۋرۋحانا اكىمشىلىگى مۇنىڭ ءبارىن جوققا شىعارىپ وتىر. سەبەبى، ءىس جۇزىندە وقيعا كۋاگەرلەرى جوق. سونداي-اق بۇل ماسەلەگە قاتىستى ەشكىم اۋرۋحانا باسشىلىعىنا شاعىم بىلدىرمەگەن. اۋرۋحانا باسشىلىعى وقيعانىڭ ءمان-جايى انىقتالعاننان كەيىن، ءتيىستى شارالار قابىلداناتىنىن جەتكىزدى.
«№7 قالالىق كلينيكالىق اۋرۋحانانىڭ پاسيەنتتەردى قولداۋ جانە ىشكى اۋديت قىزمەتىنە، قابىلداۋ ءبولىمىنىڭ قىزمەتكەرلەرى اراسىنداعى جانجال تۋرالى دابىل ءتۇستى. ءمان-جايدى انىقتاۋ ءۇشىن بولىمشەنىڭ مەديسينا قىزمەتكەرلەرىمەن، ونىڭ ىشىندە بولىمشە مەڭگەرۋشىسىمەن، سانيتارمەن اڭگىمە جۇرگىزىلدى. ىشكى اۋديت قىزمەتىنە جۇمىس كۇنى ىشىندە قابىلداۋ بولىمىندەگى جۇمىس پروسەسىن باقىلاۋ تاپسىرىلدى»، دەدى الماتى قالالىق قوعامدىق دەنساۋلىق ساقتاۋ باسقارماسى.