قازاقستان بارىسى ماقسات يساعابىلوۆ الەم كۋبوگىندا جەڭىمپاز اتاندى

الەم كۋبوگىنا دۇنيەجۇزىنىڭ 15 مەملەكەتىنەن بالۋاندار كەلدى

بيىل «قازاقستان بارىسى» اتانعان قىزىلوردالىق بالۋان ماقسات يساعابىلوۆ رۋمىنيانىڭ كونستانسا قالاسىندا وتكەن قازاق كۇرەسىنەن الەم كۋبوگىندا جەڭىمپاز اتاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.

الەم كۋبوگىنا دۇنيەجۇزىنىڭ 15 مەملەكەتىنەن بالۋاندار كەلدى.

تارتىستى وتكەن باسەكەدە قازاقستان قۇراماسى جالپىكوماندالىق ەسەپتە ءبىرىنشى ورىن الدى. جەڭىمپازدار مەن جۇلدەگەرلەرگە مەدالمەن بىرگە اقشالاي سىيلىق بەرىلدى.

ەلىمىزدىڭ ۇزدىك بالۋانى ماقسات يساعابىلوۆقا 100 كەلىدەن جوعارى سالماقتا قارسىلاس شاق كەلگەن جوق.
جۇلدە تىگىلگەن سەگىز سالماقتىڭ جەتەۋىندە قازاقستاندىق سپورتشىلار مىقتى ەكەنىن كورسەتتى. ولاردىڭ قاتارىندا بەكجان تولەپوۆ، مارات نىعماتۋللايەۆ، نۇربولات مىرزانوۆ، سافۋان مۇراتبەكوۆ، ەلامان قويشىبايەۆ پەن اسەت احمەتجانوۆتار چەمپيون اتاندى.

ال 100 كەلىگە دەيىنگى سالماقتا ەركىنبەك بولەن كامەرۋندىق دولاسەم دەدوننەگە جول بەرىپ قويدى.
ەسكە سالساق، بۇدان بۇرىن ءجاميلا باقبەرگەنوۆا مەن ازامات داۋلەتبەكوۆ ەركىن جانە ايەلدەر كۇرەسىنەن الەم كۋبوگىنا شاقىرتۋ العان ەدى.