بۇل سامميت كليماتتىق قارجىلاندىرۋ ماسەلەلەرىنە ارنالادى.
2024 جىلعى قاراشادا باكۋدا بۇۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنسياسى (COP29) تاراپتارى كونفەرەنسياسىنىڭ 29-شى سەسسياسى وتەدى، دەپ حابارلايدى Almaty-akshamy.kz
بۇل تۋرالى ق ر پرەزيدەنتىنىڭ كەڭەسشىسى – پرەزيدەنتتىڭ حالىقارالىق ەكولوگيالىق ىنتىماقتاستىق جونىندەگى ارناۋلى وكىلى ءزۇلفيا سۇلەيمەنوۆانىڭ ازەربايجانعا جۇمىس ساپارى بارىسىندا ايتىلدى.
كونفەرەنسيا كونۆەنسيانىڭ شەشىم قابىلدايتىن جوعارى ورگانى بولىپ سانالادى. جىل سايىن الەمنىڭ تۇكپىر-تۇكپىرىنەن كەلگەن ۇكىمەتتەردىڭ وكىلدەرى كونفەرەنسياعا جينالىپ، كليماتتىڭ وزگەرۋىن بولدىرماۋ جانە ونىڭ سالدارىن جويۋ جونىندەگى جۇمىستا كۇشتەرىن بىرىكتىرەدى.
ساپار اياسىندا ءزۇلفيا سۇلەيمەنوۆا جانە قازاقستاننىڭ ازەربايجانداعى ەلشىسى ءالىم بايەل ازەربايجان پرەزيدەنتىنىڭ سىرتقى ساياسات ماسەلەلەرى جونىندەگى كومەكشىسى ح. گادجييەۆ، ەنەرگەتيكا ءمينيسترى پ. شاحبازوۆ، ەكولوگيا جانە تابيعي رەسۋرستار ءمينيسترى، سور29 پرەزيدەنتى م.بابايەۆ، ميللي ءماجىلىس دەپۋتاتى، COP29-داعى بۇۇ-نىڭ كليمات جونىندەگى جوعارى دەڭگەيدەگى كوشباسشىسى ن. ارپاداراي، سىرتقى ىستەر ءمينيسترىنىڭ ورىنباسارى، COP29 باس كەلىسسوز جۇرگىزۋشىسى يا.رافييەۆپەن كەزدەسۋلەر وتكىزدى. كەزدەسۋلەر بارىسىندا COP29-عا دايىندىق ماسەلەلەرى تالقىلاندى.
ز. سۇلەيمانوۆا ازەربايجاندى وسىنداي ماڭىزدى ءىس-شارانىڭ وتكىزىلۋىمەن قۇتتىقتاپ، قازاقستاننىڭ قولداۋ كورسەتۋگە جانە تىعىز ىنتىماقتاستىققا دايىن ەكەنىن ءبىلدىردى.
ءوز كەزەگىندە ازەربايجاندىق ارىپتەستەر قازاقستانعا قولداۋى ءۇشىن العىس ءبىلدىرىپ، COP29 ءتوراعالىعى اياسىنداعى ازەربايجاننىڭ باسىمدىقتارى مەن باستامالارى، وسى بەدەلدى ءىس-شاراعا دايىندىق جۇمىستارى، مەملەكەتتەرمەن جانە حالىقارالىق ۇيىمدارمەن كەلىسسوزدەر پروسەسى تۋرالى اقپارات بەردى.
كەزدەسۋلەر بارىسىندا تاراپتار دامۋدىڭ ەكولوگيالىق ۇلگىسىنە كوشۋ بويىنشا تاجىريبە الماستى. اتاپ ايتقاندا، ازەربايجاندىق ارىپتەستەر ەكولوگيالىق تازا ەنەرگيا ءوندىرۋ بويىنشا، ونىڭ ىشىندە قاراباق وڭىرىندە جۇرگىزىلىپ جاتقان جۇمىستار تۋرالى ايتىپ بەردى. جاسىل ەلەكتر ەنەرگياسىن ەۋروپاعا ەكسپورتتاۋ ماقساتىندا قارا جانە كاسپيي تەڭىزدەرىنىڭ تۇبىمەن ەلەكتر كابەلدەرىن وتكىزۋ ەلدەرىمىزدىڭ جاسىل كۇن ءتارتىبىن ىلگەرىلەتۋگە قوسقان ەلەۋلى ۇلەسى بولاتىنى اتالىپ ءوتتى.
ق ر پرەزيدەنتىنىڭ كەڭەسشىسى قازاقستان كوشباسشىسىنىڭ قورشاعان ورتانى قورعاۋ ماسەلەلەرىنە ەرەكشە نازار اۋداراتىنىن ايتىپ، ازەربايجان تاراپىن قازاقستاننىڭ جاسىل ەنەرگەتيكاعا كوشۋ جونىندەگى باستامالارى تۋرالى، ونىڭ ىشىندە الماتىدا قۇرىلىپ جاتقان ورتالىق ازيا ەلدەرىنىڭ كليمات جانە جاسىل ەنەرگەتيكا ماسەلەلەرى جونىندەگى جوبالىق كەڭسەسى تۋرالى حاباردار ەتتى. بۇل كەڭسە شەڭبەرىندە جوبالار پورتفەلىن قالىپتاستىرۋ باستالدى. سور29-داعى ازەربايجان ءتوراعالىعىن قولداۋ ماقساتىندا ز. سۇلەيمەنوۆا كليماتتىڭ وزگەرۋىنە قارسى كۇرەس بويىنشا بىرلەسكەن جوبالاردى ازىرلەۋدى ۇسىندى. ازەربايجاندىق ارىپتەستەر ۇسىنىستى قولداپ، قازاقستاننىڭ ەكولوگيالىق باستامالاردى ىلگەرىلەتۋدەگى جانە ءتيىستى زاڭنامانى قالىپتاستىرۋداعى ەلەۋلى جەتىستىكتەرىن اتاپ ءوتتى.