حالىقارالىق ساۋدانىڭ ءوسۋى جانە اۋىل شارۋاشىلىعى ونىمدەرىنىڭ اينالىمىنىڭ ارتۋى جاعدايىندا فيتوسانيتاريالىق قاۋىپسىزدىك ماسەلەلەرى ەرەكشە ماڭىزعا يە بولىپ وتىر، - دەپ حابارلايدى Aqshamnews.kz.
زەرتحانالىق زەرتتەۋلەردى قوسا العاندا، كارانتينگە جاتقىزىلاتىن ءونىمدى ءتيىمدى باقىلاۋ – ىشكى نارىقتى قورعاۋدىڭ جانە ازىق-تۇلىك قاۋىپسىزدىگىن قامتاماسىز ەتۋدىڭ ماڭىزدى قۇرالى.
2025 جىلعى 24 قاراشادان باستاپ شىعىس قازاقستان، ماڭعىستاۋ، تۇركىستان، اباي جانە جەتىسۋ وبلىستارىندا كارانتيندىك فيتوسانيتاريالىق ساراپتامانى اقىلى نەگىزدە جۇرگىزۋدىڭ جاڭا ءتارتىبى پيلوتتىق رەجيمدە ەنگىزىلدى. بۇل شەشىم وزبەكستان، ازەربايجان، جۇڭگو، بەلارۋس جانە رەسەي تاجىريبەسىن ەسكەرە وتىرىپ قابىلداندى جانە كورشىلەس مەملەكەتتەرمەن تەڭ جاعداي قالىپتاستىرۋعا باعىتتالعان. ساراپتامانى «فيتوسانيتاريا» شجق رمك جۇرگىزەدى.
جاڭا ءتارتىپتىڭ ءتيىمدى جۇمىس ىستەۋى ءۇشىن اتالعان وبلىستارعا كارانتينگە جاتقىزىلاتىن ءونىم جەتكىزىلەتىن باقىلاۋ پۋنكتتەرى ايقىندالدى. ەكسپورتتالاتىن ونىمگە ارنالعان زەرتحانالىق ساراپتاما ەلىمىزدىڭ بارلىق وڭىرىندە ۇيىمداستىرىلعان.
ءتارتىپتى ەنگىزۋگە دەيىن سىرتقى ساۋدا قىزمەتىنە قاتىسۋشىلارمەن ءتۇسىندىرۋ كەزدەسۋلەرى وتكىزىلدى. تەرريتوريالىق بولىمشەلەر مەن زەرتحانالاردىڭ ماماندارى قاجەتتى وقىتۋ كۋرسىنان ءوتتى. ينسپەكسيا باسشىلارىنا ساراپتامالاردىڭ ساپالى جانە ۋاقىتىلى جۇرگىزىلۋىن قامتاماسىز ەتۋ تاپسىرىلدى.
جاڭا ءتارتىپ فيتوسانيتاريالىق قىزمەتتەردىڭ ساپاسىن ارتتىرۋعا مۇمكىندىك بەرەدى دەپ كۇتىلۋدە. ساراپتامالاردان تۇسەتىن قاراجات سالانى دامىتۋعا – زەرتحانالىق جابدىقتاردى جاڭارتۋعا، ماتەريالدىق-تەحنيكالىق بازانى نىعايتۋعا جانە مامانداردىڭ بىلىكتىلىگىن ارتتىرۋعا باعىتتالاتىن بولادى.