قازاقستاننىڭ اۆياسيالىق اكىمشىلىگى iPADIS حالىقارالىق ۇيىمىمەن ءوزارا ىنتىماقتاستىق تۋرالى مەموراندۋمعا قول قويدى.
كەلىسىم اياسىندا ق ر ييدم ازاماتتىق اۆياسيا كوميتەتى وتاندىق اۆياسيا سالاسىندا تۇجىرىمدامالىق جانە پراكتيكالىق تاسىلدەردى ارتتىرۋدى جانە حالىقارالىق ىنتىماقتاستىقتىڭ وزىق ستاندارتتارىن دامىتۋدى كوزدەپ وتىر، دەپ حابارلايدى Almaty-akshamy.kz.
سونىمەن قاتار تاراپتار ۇشۋ قاۋىپسىزدىگى، اەروناۆيگاسيالىق الەۋەت پەن تيىمدىلىك، اۆياسيالىق قاۋىپسىزدىك جانە راسىمدەردى وڭايلاتۋ، اۋە كولىگىن ەكونوميكالىق دامىتۋ جانە قورشاعان ورتانى قورعاۋ سالالارىندا تىعىز ىنتىماقتاستىق ورناتۋعا نيەتتى.
«وسى قۇجات ارقىلى قازاقستان ازاماتتىق اۆياسيا سەكتورىن دامىتۋ جونىندەگى ءوز مىندەتتەمەلەرىن نىعايتادى جانە ەلىمىزدىڭ اۆياسيالىق اكىمشىلىگى iPADIS سىندى ىرگەلى ۇيىمدارمەن بايلانىسىن ارتتىرادى. بۇل – اۆياسيا سەكتورىنا وڭ اسەر ەتەتىن يننوۆاسيالىق يدەيالاردى ازىرلەۋگە تىڭ سەرپىن بەرمەك»، - دەپ اتاپ ءوتتى قازاقستاننىڭ اۆياسيالىق اكىمشىلىگىنىڭ باس ديرەكتورى كاتالين رادۋ.
ءوز كەزەگىندە iPADIS حالىقارالىق ۇيىمىنىڭ پرەزيدەنتى ولۋمۋييۆا بەنارد اليۋ قازاقستاننىڭ اۋە اكىمشىلىگىمەن تىعىز ارىپتەستىك قارىم-قاتىناس ورناتۋعا مۇددەلى ەكەندىگىن جەتكىزدى.
«ءبىز ءوز تاراپىمىزدان يننوۆاسيالىق تەحنولوگيالار، وقىتۋ، جولاۋشىلار قۇقىعىن قورعاۋ جانە اۋە تاسىمالىنىڭ جالپىعا بىردەي قولجەتىمدىلىگى سياقتى ماڭىزدى ماسەلەلەردە ءاردايىم قولداۋ كورسەتۋگە دايارمىز»، - دەدى ولۋمۋييۆا بەنارد اليۋ.
ايتا كەتەيىك، iPADIS الەمدىك اۆياسيا سالاسىنداعى وڭ وزگەرىستەردى ءتيىمدى قورعاۋ ءۇشىن قۇرىلعان. ونىڭ نەگىزگى مىندەتى – حالىقارالىق، ايماقتىق جانە ۇلتتىق دەڭگەيدەگى اۆياسيا ساياساتى مەن باعدارلامالاردى ازاماتتىق قوعام تاراپىنان وڭتايلى قاراستىرۋ. ۇيىمنىڭ شتاب-پاتەرى كانادانىڭ مونرەال قالاسىندا ورنالاسقان.