7-11 قاراشا ارالىعىندا يسپانيانىڭ تەنەريفە ارالىندا اۆياديسپەچەرلەر اراسىندا فۋتبولدان الەم چەمپيوناتى ءوتتى. وعان 16 مەملەكەت قاتىستى. قازاقستان اتىنان «قازاقستان» جانە «استانا» اەروناۆيگاسيالىق قىزمەتتەرى قىزمەتكەرلەرىنىڭ ەكى كومانداسى ب ا ق سىنادى، دەپ حابارلايدى Almaty-akshamy.kz Inform.kz-كە سىلتەمە جاساپ.
تۋرنير بارىسىندا ءبىزدىڭ كوماندالار ۆەنگريا، امەريكا قۇراما شتاتتارى، كيپر، يسپانيا، يتاليا اۋە ديسپەچەرلەرىنىڭ قۇراما كوماندالارىمەن فۋتبول ماچىن وتكىزدى.
تارتىستى وتكەن ويىندا قازاقستاندىقتار جەڭىسكە جەتىپ، فينالعا شىقتى.
ناتيجەسىندە «قازاقستان» قازاەروناۆيگاسيا رمك كومانداسى الەم چەمپيونى اتاعىن جەڭىپ الدى.
ال «استانا» كازاروناۆيگاسيا رمك كومانداسى - ەكىنشى ورىن، ءۇشىنشى ورىندى يسپانيانىڭ «ينتەرنەشنل» قۇراما كومانداسى يەلەندى.
