قازاقستان اۋعانستاننىڭ جاعدايىن تالقىلاۋعا قاتىستى

قازاقستاندىق تاراپتى قازاقستان رەسپۋبليكاسى پرەزيدەنتىنىڭ اۋعانستان بويىنشا ارنايى وكىلى تالعات قالييەۆ باستادى.

ونلاين-فورماتتا بۇۇ-نىڭ ورتالىق ازيا ءۇشىن پريەۆەنتيۆتى ديپلوماتيا جونىندەگى وڭىرلىك ورتالىعىنىڭ باسشىسىنىڭ قاتىسۋىمەن اۋعانستان، قازاقستان، قىرعىزستان، تاجىكستان، تۇرىكمەنستان جانە وزبەكستاننىڭ سىرتقى ساياسي ۆەدومستۆولارى باسشىلارىنىڭ وتىرىسى ءوتتى، دەپ حابارلايدى Almaty-akshamy.kz ق ر ءسىم باسپا ءسوز قىزمەتىنە سىلتەمە جاساپ.

كونفەرەنسياعا قاتىسۋشىلار اۋعانستانداعى بەيبىتشىلىك پەن ەكونوميكالىق دامۋدى قامتاماسىز ەتۋدىڭ كەلەشەگىن، ساياسي، ساۋدا-ەكونوميكالىق جانە ترانزيتتىك-كولىك سالالارداعى ءوزارا ءىس-قيمىلدى دامىتۋ مۇمكىندىكتەرىن، سونداي-اق ناتو مەن اقش جەتەكشىلىك ەتكەن حالىقارالىق كواليسيا كۇشتەرى شىعارىلعاننان كەيىن ءوڭىردىڭ قاۋىپسىزدىگى مەن اۋعانستاننىڭ بولاشاق ساياسي قۇرىلىمى ماسەلەلەرىن تالقىلادى.

تالعات قالييەۆ اۋعانستانداعى بەيبىتشىلىك پروسەسىنىڭ بارلىق تاراپتارى اراسىندا كونسەنسۋس قالىپتاستىرۋعا جانە ونىڭ ورتالىق ازياداعى ەكونوميكالىق پروسەستەرگە دايەكتى ينتەگراسيالانۋىنا باعىتتالعان حالىقارالىق كۇش-جىگەرگە قولداۋ ءبىلدىردى.

وتىرىس قورىتىندىسى بويىنشا كەزدەسۋگە قاتىسۋشىلار اۋعانستانداعى جاعدايدى رەتتەۋ جانە تۇراقتىلىقتى قامتاماسىز ەتۋ قاجەتتىگىن اتاپ ءوتتى. بەيبىتشىلىك ورناتۋعا، حالىقتى بىرىكتىرۋگە، قوعامدى دەموكراتيالاندىرۋعا جانە اۋعانستاندى وركەندەتۋگە باعىتتالعان بەيبىتشىلىك پروسەسىن قولداۋ تۋرالى بىرلەسكەن مالىمدەمە قابىلداندى.