پرەزيدەنتتىڭ تاپسىرماسى بويىنشا بۇل ەلگە 5 مىڭ توننا ۇن جىبەرىلگەن
قازاقستان اۋعانستانعا 1،9 ملن دوللان بولاتىن 155 توننا كولەمىندە ازىق-تۇلىك جانە دارى-دارمەك سالىنعان گۋمانيتارلىق جۇك جىبەردى. بۇل تۋرالى ساۋدا جانە ينتەگراسيا ءمينيسترى باقىت سۇلتانوۆ ايتتى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
مينيسترلىكتىڭ دەرەگىنشە، ۆەدومستۆو باسشىسى اۋعانستان استاناسى كابۋلعا بارعان. ساپار بارىسىندا باقىت سۇلتانوۆ اۋعانستان پرەمەر-مينيسترىنىڭ ورىنباسارى ابدۋللا سالام حانافي، سىرتقى ىستەر ءمينيسترى امير حان مۋتتاكي، ساۋدا جانە ونەركاسىپ ءمينيسترى نۋريددين ازيزيمەن كەزدەسكەن.
مينيستر پرەزيدەنت قاسىم-جومارت توقايەۆتىڭ تاپسىرماسى بويىنشا قازاقستان اۋعانستانعا 5 مىڭ توننا ۇندى گۋمانيتارلىق كومەك رەتىندە جىبەرگەنىن ايتتى.
«بۇگىن ءبىز قوسىمشا 1،5 توننا جۇك (دارى-دارمەك) اكەلدىك. سونداي-اق 1،9 ملن دوللار بولاتىن 155 توننا ازىق-تۇلىك جانە دارى-دارمەك سالىنعان گۋمانيتارلىق جۇك جىبەرىلدى. جاقىندا ول اۋعانستان اۋماعىنا وتەدى» - دەدى باقىت سۇلتانوۆ.
ول دۇنيەجۇزىلىك ازىق-تۇلىك باعدارلاماسى 20 مىڭ توننا قازاقستاندىق ۇندى ساتىپ العانىن ايتتى.
«قازاقستان كوپتەگەن حالىقارالىق ارىپتەس سياقتى، اۋعانارالىق قاقتىعىستىڭ بەلسەندى كەزەڭى اياقتالدى جانە ەلدى جانجالدان كەيىنگى كەزەڭدە قالپىنا كەلتىرۋ ۋاقىتى كەلدى دەپ ۇمىتتەنەمىز» - دەدى مينيستر.
سونىمەن قاتار باقىت سۇلتانوۆ قازاقستان بيلىگى اۋعانستاننىڭ ىشكى ىسىنە ارالاسپايتىنىن اتاپ ءوتتى.
«ءبىز ءداستۇرلى تۇردە تەرروريزم مەن ەسىرتكى قىلمىسىنان ازات بەيبىت، ءبىرتۇتاس، تاۋەلسىز جانە وركەندەگەن اۋعانستاندى قولدايمىز. اۋعان حالقى بەيبىتشىلىكتى ورناتۋ جانە ودان ءارى دامۋ ءۇشىن ءوز بولاشاعىن ءوزى انىقتاۋعا قۇقىلى»، - دەدى باسشى.