بارشاڭىزعا بەلگىلى، بۇگىنگى تاڭدا ءبىز الەمدەگى رەاكتورلاردىڭ 40%-ىن ۋرانمەن قامتاماسىز ەتىپ وتىرمىز. قازاقستان – ۋران ءوندىرۋ بويىنشا كوشباسشى مەملەكەت، ءارى الەمدىك اتوم ەنەرگەتيكاسى نارىعىنداعى نەگىزگى ويىنشى. الايدا، الداعى ۋاقىتتا قازاقستان ءوزىنىڭ يادرولىق الەۋەتىن ىشكى قاجەتتىلىكتەرگە دە باعىتتاۋى كەرەك.
بۇل ماسەلەدە ەل پرەزيدەنتى قاسىم-جومارت توقايەۆتىڭ باستاماسىمەن 6 قازاندا وتەتىن جالپىحالىقتىق رەفەرەندۋم اسا ماڭىزدى ءرول اتقارادى. رەفەرەندۋمدا وڭ شەشىم قابىلدانسا، «قازاتومونەركاسىپ» تەك الەمدىك نارىققا ۋران جەتكىزۋمەن عانا شەكتەلمەي، ەلىمىزدەگى اەس-تى وتىنمەن قامتاماسىز ەتۋگە تولىق دايىن بولادى.
ءبىز ءۇشىن ەڭ باستىسى – اتوم ەنەرگياسىن تەك بەيبىت ماقساتتا پايدالانۋ. قازاقستاننىڭ بۇل سالادا مول تاجىريبەسى مەن دامىعان ينفراقۇرىلىمى بار. «قازاتومونەركاسىپ» حالىقارالىق ستاندارتتارعا سايكەس جۇمىس ىستەپ كەلەدى، اسىرەسە اتوم ەنەرگياسى جونىندەگى حالىقارالىق اگەنتتىكتىڭ (ماگاتە) قاۋىپسىزدىك تالاپتارىن قاتاڭ ساقتايمىز. ءبىز ۋراندى ءوندىرۋ مەن وڭدەۋ بويىنشا الەمدىك ستاندارتتارعا ساي ارەكەت ەتىپ، قازاقستاننىڭ يادرولىق سالاسىنداعى بەدەلىن نىعايتىپ كەلەمىز.
الەمدە اتوم ەنەرگەتيكاسىنا سۇرانىس ارتىپ كەلەدى. بۇگىنگى تاڭدا 439 يادرولىق رەاكتور جۇمىس ىستەپ تۇر، ال تاعى 64 رەاكتور قۇرىلىسى جۇرگىزىلىپ جاتىر. ولاردىڭ جارتىسى قىتايدا، ءۇندىستاندا 7 رەاكتور بار، ال رەسەي، تۇركيا جانە مىسىر ەلدەرىندە 4 اەس سالىنىپ جاتىر. وڭتۇستىك كورەيا، ۇلىبريتانيا، جاپونيا جانە باسقا دا ەلدەردە اتوم ەنەرگەتيكاسى قارقىندى دامۋدا.
جەر شارىنداعى حالىق سانىنىڭ ءوسۋى، ەكونوميكالىق دامۋ جانە ۋربانيزاسيا ەنەرگياعا دەگەن سۇرانىستى ارتتىرىپ وتىر. دۇنيەجۇزىلىك اتوم قاۋىمداستىعىنىڭ مالىمەتىنشە، مەملەكەتتەر ەنەرگيا ءوندىرىسىن ارتتىرۋمەن قاتار، پارنيكتىك گازداردىڭ شىعارىلۋىن ازايتۋعا دا ەرەكشە كوڭىل بولۋدە. اتوم ەنەرگياسى – وسى ماسەلەلەردى شەشۋدىڭ ەڭ ءتيىمدى جولدارىنىڭ ءبىرى، ويتكەنى ول تۇراقتى، سەنىمدى جانە ەكولوگيالىق تازا ەنەرگيا كوزى.
قازاقستان ءۇشىن اەس سالۋ ەلدىڭ ەنەرگەتيكالىق قاۋىپسىزدىگىن نىعايتىپ قانا قويماي، حالىقارالىق ارەنادا ءوزىنىڭ ەنەرگەتيكالىق دەرجاۆا رەتىندەگى ءرولىن كۇشەيتۋگە مۇمكىندىك بەرەدى. اتوم ەنەرگياسى ەلىمىزدى ەنەرگيا تاپشىلىعىنان قۇتقارىپ، ەكونوميكالىق وسىمگە جول اشىپ قانا قويماي، جاھاندىق ەكولوگيالىق ماسەلەلەردى شەشۋگە دە سەپتىگىن تيگىزەدى. بۇل قازاقستاننىڭ الداعى كەزەڭدەگى دامۋ ستراتەگياسىندا ماڭىزدى ورىن الادى.
ەگەر 6 قازاندا وتەتىن رەفەرەندۋمدا وڭ شەشىم قابىلدانسا، ءبىز، «قازاتومونەركاسىپ» كومپانياسى، ەلىمىزدىڭ اتوم ەلەكتر ستانسياسىن ۋرانمەن قامتاماسىز ەتۋگە جانە اتوم ەنەرگياسىن بەيبىت ماقساتتا پايدالانۋ بويىنشا بارلىق قاجەتتى شارالاردى ىسكە اسىرۋعا دايىنبىز. قازاقستاننىڭ باي تابيعي رەسۋرستارى مەن حالىقارالىق تاجىريبەسى اتوم ەنەرگەتيكاسىن دامىتۋعا تولىق مۇمكىندىك بەرەدى. بۇل قادام ءبىزدىڭ ەنەرگەتيكالىق تاۋەلسىزدىگىمىزدى كۇشەيتىپ، ەلدىڭ بولاشاعىن جارقىن ەتەدى دەپ سەنەمىن.