بيىل گەوساياسي جاعدايعا بايلانىستى الەمدىك نارىقتا بيدايعا سۇرانىس جوعارى.
قازاقستان استىق ەكسپورتى بويىنشا ەۋروپا وداعى ەلدەرىنىڭ جاڭا نارىقتارىنا شىعۋ جولدارىن پىسىقتاپ جاتىر. بۇل تۋرالى اۋىل شارۋاشىلىعى مينيسترلىگىنەن ءمالىم بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستاندىق بيداي مەن ۇننىڭ ءداستۇرلى يمپورتتاۋشىلارى رەتىندە ورتالىق ازيا ەلدەرى مەن اۋعانستان سانالادى. مينيسترلىك قىتايعا، كاۆكاز ەلدەرىنە (ءازىربايجان، گرۋزيا)، پاكىستانعا، تۇركياعا، يرانعا ەكسپورت كولەمىن ۇلعايتۋ، سونداي-اق ەو نارىقتارىن اشۋ بويىنشا ءتيىستى جۇمىس جۇرگىزىپ جاتىر»، - دەپ اتالىپ وتكەن اتالعان ۆەدومستۆونىڭ قازاقپارات اگەنتتىگىنە بەرگەن جاۋابىندا.
بيىل نەگىزگى بيداي وندىرۋشىلەر بولىپ سانالاتىن رەسەي مەن ۋكرايناداعى گەوساياسي جاعدايعا بايلانىستى الەمدىك نارىقتا بيدايعا سۇرانىس جوعارى.
«بۇل فاكتور قازاقستاندىق بيداي مەن ۇن ەكسپورتىنىڭ ۇلعايۋىنا اسەر ەتتى. ستاتيستيكا دەرەكتەرىنە سايكەس، 2022 جىلعى قاڭتار-ناۋرىزدا بيداي ەكسپورتى 2 025 مىڭ توننانى قۇرادى، بۇل وتكەن جىلدىڭ وسى كەزەڭىمەن سالىستىرعاندا 1،6 ەسە ارتىق (2021 جىلعى قاڭتار-ناۋرىز – 1 240 مىڭ توننا). وسى جىلعى 8 شىلدەدەگى جاعداي بويىنشا ەكسپورت 3035،5 مىڭ توننانى قۇرادى. ۇن بويىنشا دا وسىنداي جاعداي، 2022 جىلدىڭ قاڭتار-ناۋرىز ايلارىندا 468 مىڭ تونناسى ەكسپورتتالدى. بۇل وتكەن جىلدىڭ وسى كەزەڭىمەن سالىستىرعاندا 35،6 پايىزعا ارتىق (2021 جىلعى قاڭتار-ناۋرىز – 345 مىڭ توننا). بيىلعى 8 شىلدەدەگى جاعداي بويىنشا ەكسپورت 784،7 مىڭ تونناعا جەتتى. وسى ورايدا ەنگىزىلگەن شەكتەۋ شارالارىنا قاراماستان، بيىل ءداستۇرلى تۇردە ءونىم وتكىزىلەتىن نارىقتاردا بيداي مەن ۇن ەكسپورتىنىڭ قارقىنى ساقتالادى»، - دەپ اتالىپ وتكەن اشم مالىمەتىندە.