قازاقستاندىق QazVac ۆاكسيناسى ءبىرىنشى كومپونەنتىنىڭ 5 مىڭ دوزاسى جانە ەكىنشىسىنىڭ 5 000 دوزاسى قالالىق ەمحانالارعا، ساۋدا ويىن-ساۋىق ورتالىقتارى مەن ساۋدا ۇيلەرىنە ءبولىندى.
نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ قويماسىنا وتاندىق ۆاكسينانىڭ 10 مىڭ دوزاسى جەتكىزىلدى، دەپ حابارلايدى Almaty-akshamy.kz نۇر-سۇلتان قالالىق اكىمدىگىنە سىلتەمە جاساپ.
وتاندىق پرەپاراتتى «مەديكەر استانا» ج ش س، «مەديكەر پەدياتريا»، «وتباسىلىق دارىگەرلەر كلينيكاسى»، UMC كورپوراتيۆتىك قورىنان الۋعا بولادى.
«جەرگىلىكتى ۆاكسينا ءبىرازدان بەرى بولعان جوق. جۇرتتىڭ ءبىر بولىگى بۇل ۆاكسينانىڭ ءتۇسۋىن كۇتىپ ءجۇردى، ەندى ول قولىمىزعا ءتۇستى. ايتا كەتەيىك، ۆاكسينالار ق ر دەنساۋلىق ساقتاۋ مينيسترلىگى سك-فارماسيامەن بىرلەسكەن بۇيرىعى مەن كەستەسىنە سايكەس تاراتىلادى. 10 مىڭ دوزا ءتىزىم بويىنشا قولدا بار ۆاكسينالاۋ پۋنكتتەرىنە ۇلەستىرىلەدى. بۇگىن-ەرتەڭ ەگۋ پۋنكتتەرىنە جەتكىزىلۋى ءتيىس»، - دەدى قوعامدىق دەنساۋلىق ساقتاۋ باسقارماسى.
باسقارما ەكىنشى كومپونەنتتى الۋدا قيىندىق بولدىرماس ءۇشىن ازاماتتاردان مۇمكىندىگىنشە ءبىر جەردەن الۋدى، ياعني ەكى كومپونەنتتى دە ءبىر ەگۋ پۋنكتىندە الۋدى سۇرايدى.
«ءبىرىنشى كومپونەنتتى ءبىر پۋنكتتەن، ەكىنشىسىن مۇلدەم باسقا پۋنكتەن الۋعا كەلگەندەر بولدى. ءبىز قالا تۇرعىندارىنان ءتيىستى ۋاقىتتى ساقتاي وتىرىپ، ۆاكسينانى ءبىر پۋنكتتە الۋدى سۇرايمىز»، - دەپ تولىقتىردى باسقارما.
قازىرگى ۋاقىتتا ەلوردادا ۆاكسينانىڭ ەكى ءتۇرى بار: رەسەيلىك «سپۋتنيك» جانە قازاقستاندىق «QazVac».