بيىلدان باستاپ بارلىق اسكەري قىزمەتشىلەر ءۇشىن ءبىرىڭعاي دالالىق كيىم فورماسى ەنگىزىلەدى.
اسكەري قىزمەتشىلەر ءۇشىن كيىم فورماسىنىڭ ەرلەر مەن ايەلدەرگە ارنالعان بىرنەشە ءتۇرى قاراستىرىلعان، دەپ حابارلايدى Almaty-akshamy.kz
قورعانىس مينيسترلىگى جاڭا كيىم ۇلگىلەرى قانشا تۇراتىنىن ايتتى. ۆەدومستۆونىڭ حابارلاۋىنشا، ق ر قارۋلى كۇشتەرىن زاتتاي مۇلىكپەن قامتاماسىز ەتۋ ونەركاسىپ جانە قۇرىلىس مينيسترلىگىنىڭ بيۋدجەتى اياسىندا جۇرگىزىلىپ جاتىر.
«سونىمەن قاتار، پرەزيدەنتتىڭ 2023 جىلعى 12 جەلتوقسانداعى «ق ر پرەزيدەنتىنىڭ 2011 جىلعى 25 قازانداعى «ق ر قارۋلى كۇشتەرى، باسقا دا اسكەرلەرى مەن اسكەري قۇرالىمدارى اسكەري قىزمەتشىلەرىنىڭ اسكەري كيىم نىسانى مەن ايىرىم بەلگىلەرى تۋرالى» 144 جارلىعىنا وزگەرىستەر ەنگىزۋ تۋرالى» 413 جارلىعىنىڭ 2-تارماعىنا سايكەس، ۇكىمەتكە رەسپۋبليكالىق بيۋدجەتتە كوزدەلگەن قاراجات شەگىندە اسكەري كيىمنىڭ ەسكى ۇلگىلەرىنىڭ كيۋ مەرزىمدەرىن ەسكەرە وتىرىپ، كەزەڭ-كەزەڭىمەن شارالار قابىلداۋ تاپسىرىلدى»، — دەلىنگەن رەداكسيانىڭ رەسمي سۇراۋىنا بەرىلگەن جاۋاپتا.
قورعانىس مينيسترلىگى جاڭا كيىم ۇلگىلەرىنە كوشۋ سەبەبىنەن بيۋدجەت ۇلعايتىلمايتىنىن اتاپ ءوتتى. قوسىمشا شىعىندار قاجەت ەتىلمەيدى.
«دالالىق كيىم بويىنشا ءبىر جازعى جيىنتىقتىڭ قۇنى 19 500 تەڭگەنى قۇرايدى. قىسقى دالالىق كيىم كوستيۋمى – 39 800 تەڭگە»، - دەيدى مينيسترلىك.
بەكىتىلگەن جابدىقتاۋ نورمالارىنا سايكەس، مەرزىمدى قىزمەتتەگى اسكەري قىزمەتشىلەر ءبىر جىلدا جازعى كامۋفلياجدى كيىمنىڭ 3 جيىنتىعىن، قىسقى كامۋفلياجدىڭ 2 جيىنتىعىن الادى، سونداي-اق جازعى جانە قىسقى جۇمىس كيىمدەرى بار.
كيىم-كەشەكتىڭ تەك جاڭاسى (1 سانات) بەرىلەدى.
«قىزمەت مەرزىمى اياقتالعان سوڭ زاپاسقا شىعارىلاتىن اسكەري قىزمەتشى جابدىقتاۋ نورمالارىندا بەلگىلەنگەن تىزىمگە سايكەس قامتاماسىز ەتىلەدى، ونىڭ ىشىندە ءبىر جازعى، ءبىر قىسقى كيىم جيناعى، ماۋسىم بويىنشا ءىش كيىمدەر جيىنتىعى جانە باسقالارى. كەلەسى اسكەرگە شاقىرىلاتىن اسكەري قىزمەتشىلەرگە تەك قانا جاڭا كيىم-كەشەك، اياق كيىم، قۇرال-جابدىقتار مەن ءىش كيىمدەر بەرىلەدى»، - دەپ تولىقتىردى مينيسترلىك.