اپورت ەلىمىزدىڭ ەڭ ءىرى مەگوپوليسى – الماتىنىڭ ماقتانىشى.
قاسىم-جومارت توقايەۆ بۇۇ ازىق-تۇلىك جانە اۋىل شارۋاشىلىعى ۇيىمىنىڭ (FAO) باس ديرەكتورى سيۋي دۋنيۋيمەن كەزدەسۋىندە الماتىنىڭ ايگىلى اپورتىن تانىستىردى، دەپ حابارلايدى Almaty-akshamy.kz اقورداعا سىلتەمە جاساپ.
"قازاقستان المانىڭ وتانى رەتىندە كەڭىنەن تانىمال. اپورت سۇرپى ەلىمىزدىڭ ەڭ ءىرى مەگوپوليسى – الماتىنىڭ ماڭايىندا وسەدى. ءبىز المانىڭ وسى ءتۇرىن وزدەرىڭىزبەن كۇش بىرىكتىرە وتىرىپ، الەم نارىعىنا شىعارۋعا نيەتتىمىز. وسى باستامامىزدى ىسكە اسىرۋ بارىسىندا ءسىزدىڭ جەكە قولداۋىڭىزعا ارقا سۇيەيمىز"، - دەدى قاسىم-جومارت توقايەۆ.
سونىمەن قاتار مەملەكەت باسشىسى حالىقارالىق ارالدى قۇتقارۋ قورى جانە ازىق-تۇلىك قاۋىپسىزدىگى جونىندەگى يسلام ۇيىمىنىڭ ءتوراعاسى رەتىندە قازاقستاننىڭ باسىمدىقتارى تۋرالى ايتتى.
قاسىم-جومارت توقايەۆ ۇيىمدى ارال باسسەينىندەگى جەرلەردىڭ توپىراعىن مەليوراسيالاۋعا جانە سۋ رەسۋرستارىن باسقارۋعا قاتىستى جوبالار ازىرلەۋ ىسىنە جان-جاقتى قولداۋ كورسەتۋگە شاقىردى. سونداي-اق پرەزيدەنت ەلىمىزدە FAO-نىڭ ورتالىق ازياداعى وڭىرلىك بولىمشەسىن اشۋدى ۇسىندى.
ازىق-تۇلىك جانە اۋىل شارۋاشىلىعى ۇيىمىنىڭ باس ديرەكتورى جاھاندىق ازىق-تۇلىك قاۋىپسىزدىگىن قامتاماسىز ەتۋ جانە گۋمانيتارلىق كومەك كورسەتۋ ىسىندە قازاقستان ايماقتا عانا ەمەس، بۇكىل الەمدە ەلەۋلى ءرول اتقاراتىنىن اتاپ ءوتتى.
كەزدەسۋ سوڭىندا پرەزيدەنت مازمۇندى اڭگىمە-دۇكەن قۇرعانى ءۇشىن FAO باسشىلىعىنا ريزاشىلىعىن ءبىلدىرىپ، ونى الداعى حالىقارالىق استانا فورۋمىنا قاتىسۋعا شاقىردى.
قاسىم-جومارت توقايەۆ قۇرمەتتى قوناقتار كىتابىنا قولتاڭبا قالدىردى.