ماماندار بىلىمدەرى مەن دالالىق ماشىقتارىن جەتىلدىرەدى.
قازاقستان قارۋلى كۇشتەرىندە، جاۋىنگەرلىك دايارلىق جوسپارىنا سايكەس، ۆزۆودتار قۇرامىندا بولىمشەلەردى ۇيلەستىرۋ جۇرگىزىلەدى، دەپ حابارلايدى Almaty-akshamy.kz.
«قازاقستان پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ اسكەرلەردى دايارلاۋدى جەتىلدىرۋ جونىندەگى تاپسىرماسىن ىسكە اسىرۋ اياسىندا جاۋىنگەرلىك وقۋعا قاتىستى بارلىق شارا ارميانىڭ جاۋىنگەرلىك قابىلەتىن ارتتىرۋعا باعىتتالىپ وتىر. جاۋىنگەرلىك ۇيلەستىرۋ جانە بارلىق دەڭگەيدە ءوزارا ءىس-قيمىلدى پىسىقتاۋ بولىمشەلەردەن باتالوندارعا بىرتىندەپ اۋىسا وتىرىپ، كەزەڭ-كەزەڭمەن جۇرگىزىلەدى. بۇل الداعى ۋاقىتتا بارلىق جەكە قۇرامنىڭ ۇيلەسىمدى، ناقتى جانە جەدەل ءىس-قيمىلىنا قول جەتكىزۋگە مۇمكىندىك بەرەدى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
ۆزۆودتاردى دايارلاۋ بارىسىندا اسكەري قىزمەتشىلەر بىلىمدەرىن جانە دالالىق ماشىقتارىن جەتىلدىرەدى.
«اسكەري قىزمەتشىلەردى بولىمشەلەر قۇرامىندا ۇيلەسىمدى ءىس-قيمىلعا ۇيرەتۋ ماڭىزدى. ءار جاۋىنگەر، ءار بولىمشە قانداي دا ءبىر جاعدايدا ءوزىنىڭ مانيەۆرىن ءبىلۋى ءتيىس. ال كومانديرلەر كەز كەلگەن جاعدايدا شەشىم قابىلداۋى كەرەك»، – دەپ اتاپ ءوتتى مەحانيكالاندىرىلعان بريگادا كومانديرىنىڭ جاۋىنگەرلىك دايارلىق جونىندەگى ورىنباسارى، پودپولكوۆنيك ەرعازى اتايەۆ.
ۇرىسقا بارىنشا كەلتىرىلگەن جاعدايلاردا تاكتيكالىق مىندەتتەر جۇزەگە اسىرىلادى. ۆزۆودتار قۇرامىندا اسكەري قىزمەتشىلەرگە مارش جاساۋ، تىرەك پۋنكتتەرىن جابدىقتاۋ، جاۋىنگەرلىك ءتارتىپتى قالىپتاستىرۋ، قورعانىستا ۇرىس جۇرگىزۋ، شابۋىل جاساۋ جانە زاڭسىز قارۋلى قۇرامالارعا قارسى ارنايى اسكەري ءىس-قيمىلدار جۇرگىزۋ كەزىندە كەلىسىلگەن ءىس-قيمىلداردى وقىتادى. وسى ورايدا تاكتيكالىق، تاكتيكالىق-ارنايى جانە اتىس دايارلىعى، سونداي-اق جاۋىنگەرلىك ماشينالاردى جۇرگىزۋ نورماتيۆتەرى پىسىقتالادى.
ۆزۆودتاردى ۇيلەستىرۋ ناۋرىز ايىنىڭ باسىندا كۇندىزگى جانە تۇنگى ۋاقىتتا جاۋىنگەرلىك اتىس جاتتىعۋلارىمەن اياقتالادى.
