ولار رەسەيلىكتەردەن كەيىنگى ەكىنشى ورىنعا تۇراقتادى.
قازاقستاندىق اسكەريلەر رەسەيدە ءوتىپ جاتقان جارىسقا قاتىسىپ جاتىر. شارا بارىسىندا ولار جاقسى ناتيجەگە قول جەتكىزىپ جاتىر، دەپ حابارلادى Almaty-akhamy.kz.
«قازاقستان كومانداسى ارميالىق حالىقارالىق ويىندار شەڭبەرىندە ءوتىپ جاتقان «ەلبرۋس شەڭبەرى» كونكۋرسىندا ءبىرىنشى كەزەڭنىڭ ەكى ارنايى تاپسىرماسىن ورىنداۋ ناتيجەسى بويىنشا ەكىنشى ورىنعا تۇراقتادى. رەسەي كومانداسى كوش باستاپ تۇر»،— دەلىنگەن قورعانىس مينيسترلىگىنىڭ حابارلاماسىندا.
العاشقى كونكۋرستىق سايىستار بارىسىندا قاتىسۋشىلار جاساندى تاۋ بەدەرىنە شابۋىل جاساپ، تاۋلى جەردە باعدارلاۋدى پىسىقتادى. ءبىرىنشى كەزەڭ شەڭبەرىندە جاۋىنگەرلەر تاعى ءۇش ارنايى تاپسىرمانى ورىندايتىن بولادى.
ءۇش كەزەڭنەن تۇراتىن كونكۋرستار بارىسىندا قاتىسۋشىلار ارنايى تاپسىرمالاردى ورىندايدى. ەڭ كۇردەلىسى ەكىنشى كەزەڭ بولماق. وندا اسكەري قىزمەتشىلەر بيىك تاۋ جاعدايىندا مارش جاسايدى. ال ءۇشىنشى كەزەڭدە ولار ەلبرۋس شىڭىن باعىندىرماق. ونىڭ بيىكتىگى – 5 642 مەتر.
جارىسقا توعىز ەلدەن كەلگەن كوماندالار قاتىسادى. ولار – ابحازيا، ارمەنيا، ءۇندىستان، قازاقستان، جۇڭگو، پاكىستان، رەسەي، وزبەكستان جانە وڭتۇستىك وسەتيا.
حالىقارالىق كونكۋرستا ەل نامىسىن قازاقستان قارۋلى كۇشتەرىنىڭ اتىنان تاۋداعى دايارلىق ورتالىعىنىڭ اسكەري الپينيستەرى قورعايدى. جارىس كاباردين-بالقارداعى (رف) «تەرسكول» تاۋداعى پوليگونىندا وتۋدە.
