باي مەملەكەتتەر كۆي-عا قارسى ءۇشىنشى ەكپە سالۋدى باستاۋى ىقتيمال.
الەم مەملەكەتتەرى كوروناۆيرۋس ينفەكسياسىمەن كۇرەستى جالعاستىرىپ جاتىر، الايدا بۇل اۋرۋدىڭ قارقىنى تومەندەمەي تۇر، دەپ حابارلايدى Almaty-akshamy.kz قازاقستانداعى COVID-19 تارالۋىنا جول بەرمەۋ جونىندەگى ۆاك-عا سىلتەمە جاساپ.
يران
يران يسلام رەسپۋبليكاسىندا 17 تامىز كۇنى ءابسوليۋتتى انتيرەكورد - اۋرۋدىڭ 50 مىڭنان استام جاڭا جاعدايى تىركەلگەن بولاتىن. وتكەن تاۋلىكتە 36 419 جاڭا فاكتى قوسىلدى. جالپى العاندا، جۇقتىرعاندار سانى 4 677 114-كە جەتتى، 102 038 ادام قايتىس بولدى. ەل پرەزيدەنتى ەبراحيم رايسي جاڭا ۇكىمەتتىڭ نەگىزگى مىندەتتەرى كوروناۆيرۋسقا قارسى ۆاكسيناسيا جانە مەديسينالىق كومەكتى جاقسارتۋ بولادى دەپ مالىمدەدى. ءقازىر ەل حالقىنىڭ تەك 6%-ى COVID-19 ۆاكسيناسىنىڭ ەكى دوزاسىن الدى.
يندونەزيا
قايعىلى كورسەتكىش. يندونەزيا COVID-19-دان ءولىم-جىتىم سانى بويىنشا الەمدە 1-ورىندى ساقتاپ وتىر. انتيرەكورد 19 تامىزدا ورناتىلدى - ءبىر كۇندە ىندەت 1 492 تۇرعىننىڭ ءومىرىن قيدى. ال قازا بولعانداردىڭ جالپى سانى 123 981-گە جەتتى. يندونەزياداعى ادام قازاسىنىڭ جوعارى دەڭگەيى «دەلتا» شتاممىنىڭ تارالۋىنا بايلانىستى. ەل بيلىگى ۇلتتىق قونىستانۋ جانە وتباسىن جوسپارلاۋ اگەنتتىگىنەن جۇكتى جانە بالا ەمىزەتىن ايەلدەردى كوروناۆيرۋسقا قارسى ۆاكسيناسيالانۋعا ىنتالاندىرۋدى سۇرادى.
اۆستراليا
اۆستراليانىڭ ەڭ ۇلكەن قالاسى كوروناۆيرۋستىق ينفەكسيانىڭ ءورشۋىن جەڭە المادى. سيدنەي مەن ونىڭ اينالاسىنداعى جاعداي اپاتتى سيپاتقا يە بولدى. بيلىك جاڭا شەكتەۋلەردى ەنگىزۋدە، ال COVID-19 اۋرۋى بويىنشا ساندار كۇن ساناپ وسۋدە. جاڭا وڭتۇستىك ۋەلس شتاتىنىڭ پرەمەر-مينيسترى گلەديس بەرەجيكليان تۇرعىنداردى جاڭا كوۆيد-شىندىققا بەيىمدەلۋگە شاقىردى.
"ءبىز پلانەتاداعى ءالى دە لوكداۋن كۇيىندە ءومىر ءسۇرىپ جاتقان ۇلتتاردىڭ ءبىرىمىز. ءبىز شەكارالاردى اشا باستاعان ساتتە، ءار شتاتتا اۋرۋدىڭ ءورشۋى ورىن الادى، ءبىزدىڭ ماقساتىمىز - ادامداردىڭ قاۋىپسىزدىگى مەن دەنساۋلىعىن قامتاماسىز ەتۋ"، - دەپ ءتۇسىندىردى بەرەجيكليان.
كحدر
ەۋروپا پاندەميامەن كۇرەستە سولتۇستىك كورەياعا قولداۋ كورسەتەدى.گەرمانيا كوروناۆيرۋستىڭ تارالۋىنا قارسى تۇرۋعا كومەكتەسۋ ءۇشىن ماماندار جىبەرەدى. پاندەميا جاريالانعاننان بەرى پحەنيان شەكارانى جاۋىپ، ازاماتتاردىڭ ەركىن قوزعالىسىن شەكتەدى. كحدر - جابىق ەل. تامىز ايىنىڭ باسىنداعى مالىمەتتەرگە سايكەس، 35 مىڭنان استام ادام كوروناۆيرۋسقا تەست تاپسىردى، ءبىراق ينفەكسيا تۋرالى حابارلانعان جوق. سوعان قاراماستان، بۇۇ قاۋىپسىزدىك كەڭەسى كوميتەتى گەرمانيانىڭ سولتۇستىك كورەياعا گۋمانيتارلىق كومەك كورسەتۋ باعدارلاماسىن جۇزەگە اسىرۋ تۋرالى ءوتىنىمىن ماقۇلدادى.
شۆەسيا
شۆەسيا كوروناۆيرۋسقا قارسى ءۇشىنشى ەكپە سالۋدى باستاۋى ىقتيمال. ستوكگولم اكىمشىلىگى ەل ۇكىمەتىنەن قارتتار ۇيىندەگى جانە COVID-19 قاۋىپ-قاتەر توبىنداعى ازاماتتاردى قالاي جانە قاشان قايتا ۆاكسيناسيالاۋدى باستايتىنى تۋرالى اقپارات بەرۋدى تالاپ ەتتى. بۇل شۆەسيادا كوروناۆيرۋستىق ينفەكسيانىڭ كوبەيۋىنە بايلانىستى.