بۇل بايقاۋدىڭ تاريحىندا ءبىرىنشى رەت بولىپ تۇر.
«قازاقستان ارۋى – 2021» بايقاۋىنىڭ تاريحىندا العاش رەت ءۇش جەڭىمپاز انىقتالدى، دەپ حابارلايدى دەپ حابارلايدى Almaty-akshamy.kz
«قازاقستان ارۋى» اتاعىن يەلەنگەن قىزداردىڭ ءارقايسىسى قازاقستاندى ءىرى حالىقارالىق بايقاۋلاردا تانىستىرماق.
«الەم ارۋى» بايقاۋىندا قازاقستان اتىنان اقتوبەلىك 23 جاستاعى نازەركە كارمانوۆا شىعادى. ول اقتوبەدەگى قازاق-ورىس حالىقارالىق ۋنيۆەرسيتەتىن بۋحگالتەر ماماندىعى بويىنشا بىتىرگەن. ءقازىر الماتىداعى بانكتەردىڭ بىرىندە مەنەدجەر بولىپ جۇمىس ىستەيدى. بويجەتكەن بوس ۋاقىتىندا ساداق اتۋمەن اينالىسادى، ۆيدەوعا، سۋرەتكە تۇسىرگەندى ۇناتادى.
بايقاۋدىڭ تاعى ءبىر جەڭىمپازى 21 جاستاعى ايدانا احاتايەۆا بولدى. ول – «استانا ارۋى – 2021» يەگەرى. ايدانا «الەم ارۋى» بايقاۋىندا قازاقستان اتىنان شىعادى. 21 جاستاعى بويجەتكەن قازاق ۇلتتىق ونەر ۋنيۆەرسيتەتىنىڭ تۇلەگى، ءقازىر ەلوردادا مۋزىكالىق ستۋديالاردىڭ بىرىندە فورتەپيانودان ساباق بەرەدى. بوس ۋاقىتىندا كلاسسيكالىق مۋزىكا تىڭداپ، شەت تىلدەرىن ۇيرەنگەندى ۇناتادى.
ءۇشىنشى جەڭىمپاز 20 جاستاعى قاراعاندىلىق اننا گلۋبوكوۆسكايا بولدى. ول قازاقستاندى «جەر ارۋى» بايقاۋىندا تانىستىرادى. اننا الماتىدا دىبىس جابدىعىمەن اينالىساتىن كومپانيادا جۇمىس ىستەيدى. مۋزىكامەن اۋەستەنەدى، شەتەل ادەبيەتىن وقىعاندى ۇناتادى. بالا كەزىنەن ورىس تىلىنەن وليمپيادالارعا قاتىسقان جەڭىمپاز. سونىمەن قاتار، اننا بولاشاقتا بەت ارلەۋشى ماماندىعىن كاسىبي تۇردە مەڭگەرۋدى جوسپارلايدى.