اۆتوموبيل دالىزدەرى جاڭارتىلادى.
قازاقستان ۇكىمەتى مەملەكەت اۋماعى ارقىلى وتەتىن 8 حالىقارالىق ترانزيتتىك اۆتوموبيل ءدالىزىن جاڭارتۋدى كوزدەپ وتىر. بۇل جۇمىستاردى 2030 جىلى اياقتاۋدى جوسپارلاۋدا. بۇل تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۇكىمەت وتىرىسىندا مالىمدەدى، دەپ حابارلايدى Almaty-akshamy.kz.
«2747 شاقىرىمدىق «باتىس ەۋروپا – باتىس جۇڭگو» ءدالىز قىتايدان قازاقستان، رەسەي ارقىلى جانە ودان ءارى ەۋروپاعا، سونداي-اق ورتا ازيا ەلدەرىنە ترانزيتتىك اعىندى قامتاماسىز ەتەدى. ونى تولىق رەكونسترۋكسيالاۋ 2009-2017 جىلدارى جۇرگىزىلدى. كولىك اعىنىنىڭ ارتۋىنا بايلانىستى 2023-2030 جىلدارى قىزىلوردادان رەسەي شەكاراسىنا دەيىنگى ۇزاقتىعى 1 363 شاقىرىم بولاتىن ۋچاسكەنى ءى تەحنيكالىق ساناتقا كەزەڭ-كەزەڭىمەن اۋىستىرۋ جوسپارلانىپ وتىر»، - دەلىنگەن مينيسترلىكتىڭ حابارلاماسىندا.
«الماتى – قاراعاندى - نۇر-سۇلتان – پەتروپاۆل – قورعانداعى رف شەكاراسى» دالىزىمەن ورتا ازيا ەلدەرىنەن جانە قىتايدان قازاقستان، رەسەي جانە ودان ءارى ەۋروپاعا ترانزيت وتەدى. «الماتى-قاراعاندى» ۋچاسكەسىن ءىى تەحنيكالىق ساناتقا اۋىستىرا وتىرىپ، 2023 جىلى رەكونسترۋكسيالاۋ كوزدەلىپ وتىر.
«نۇر-سۇلتان – قوستاناي - چەليابينسكىدەگى رف شەكاراسى» كولىك ءدالىزىنىڭ ۇزاقتىعى 860 شاقىرىم. ول ورتا ازيا ەلدەرىنەن قازاقستان، رەسەي جانە ودان ءارى ەۋروپاعا ترانزيتتىك اعىندى قامتاماسىز ەتەدى. قوزعالىس قارقىنىنىڭ ارتۋىنا بايلانىستى «نۇر-سۇلتان – قوستاناي – چەليابينسكىدەگى رەسەي شەكاراسى» ۋچاسكەسىن 2023 جىلعا دەيىن ءى تەحنيكالىق ساناتقا اۋىستىرۋ جوسپارلانۋدا.
«جۇڭگو شەكاراسى – مايقاپشاعاي - قالباتاۋ – سەمەي – پاۆلودار -ومبىداعى رف شەكاراسى» ءدالىزى - شىعىس ءوڭىردىڭ نەگىزگى باعىتتارىنىڭ ءبىرى. ول بويىنشا ترانزيت قىتايدان قازاقستان، رەسەي اۋماعى ارقىلى جانە ودان ءارى ەۋروپاعا باعىتتالادى. ءقازىر «جۇڭگو شەكاراسى – مايقاپشاعاي -قالباتاۋ» ۋچاسكەسىن رەكونسترۋكسيالاۋ جۇرگىزىلۋدە. جۇمىستار 2023 جىلى اياقتالادى.
«الماتى – تالدىقورعان – وسكەمەن – شەمونايحا - بارناۋىلداعى رف شەكاراسى» كولىك ءدالىزىنىڭ ۇزاقتىعى 1210 شاقىرىم. بۇل دا ورتالىق ازيا مەن قىتايدان قازاقستان ارقىلى رەسەيدىڭ شىعىس وڭىرلەرىنە جانە قيىر شىعىسقا ءترانزيتتى قامتاماسىز ەتەتىن ۇلكەن سۇرانىسقا يە باعىت. ءقازىر «تالدىقورعان – وسكەمەن» اۆتوجولى جاڭارتىلۋدا. جۇمىستار 2023 جىلى تولىق اياقتالادى.
893 شاقىرىمدىق «اقتوبە – قاندىاعاش – ماقات – اتىراۋ - استراحانداعى رف شەكاراسى» دالىزىمەن وزبەكستان مەن تۇرىكمەنستاننىڭ قازاقستان جانە رەسەي ارقىلى ەۋروپاعا ءترانزيتى وتەدى. «اقتوبە-قاندىاعاش» جانە «اتىراۋ-استراحان» ۋچاسكەلەرىن 2023 جىلى جاڭارتۋ جوسپارلانىپ وتىر. بيىل «قاندىاعاش-ماقات-اتىراۋ» ۋچاسكەسىن رەكونسترۋكسيالاۋ اياقتالادى.
«اقتوبە – ورال - سامارا» كولىك ءدالىزى ورالدان ساماراعا جانە ودان ءارى برەست ارقىلى ەۋروپاعا اپارادى.
تراسەكا كولىك ءدالىزى قازىرگى گەوساياسي جاعدايعا بايلانىستى ۇلكەن سۇرانىسقا يە. ول باتىس ەۋروپا - باتىس جۇڭگو ءدالىزىنىڭ نەگىزگى بولىگى ارقىلى وتەدى جانە اقتوبە مەن دوسسور ارقىلى قازاقستاننىڭ تەڭىز پورتتارىنا شىعادى. اقتاۋ جانە قۇرىق تەڭىز پورتى ارقىلى قىتايدان جانە ورتا ازيا ەلدەرىنەن كاۆكازعا جانە ودان ءارى ەۋروپاعا ءترانزيتتى قامتاماسىز ەتەدى. ءقازىر «اقتوبە-قاندىاعاش-ماقات» ۋچاسكەلەرى جاڭارتىلىپ جاتىر. «بەينەۋ-شالقار-ىرعىز» ۋچاسكەسىن سالۋ بويىنشا جوبالىق-سمەتالىق قۇجاتتار ازىرلەنۋدە. 2025-2028 جىلدارعا جوسپارلانعان جۇمىستىڭ ناتيجەسىندە ءدالىزدىڭ قاشىقتىعى 580 شاقىرىمعا قىسقارادى.