بۇرىنعى ءماسليحات دەپۋتاتى التىن توسبەلگىسىن ساتپاقشى

تانىمال قازاقستاندىق مارافونشى مارات جىلانبايەۆ ەكىباستۇز ءماسليحاتىنداعى دەپۋتات كەزىندە العان التىن توسبەلگىسىن ساتىلىمعا شىعاردى.

ساتۋ تۋرالى حابارلاندىرۋدى ءوزىنىڭ Facebook-پاراقشاسىنا جاريالاعان گيننەسس كىتابىنىڭ جەتى دۇركىن رەكوردسمەنى توسبەلگىنىڭ باستاپقى باعاسىن 100 مىڭ تەڭگە دەپ كورسەتكەن، دەپ حابارلايدى Almaty-akshamy.kz Elorda.info-عا سىلتەمە جاساپ. 

سپورتشى 375-سىناماداعى التىنى بار التى گرامدىق توسبەلگىسىن 2003 جىلى ەكىباستۇز ءماسليحاتىنىڭ دەپۋتاتى بولىپ قايتا سايلانعان كەزدە العانىن ايتادى.

«بۇل توسبەلگىنىڭ قانداي اقشاعا ساتىپ الىنعانى ءالى كۇنگە دەيىن قۇپيا. زاڭ بويىنشا ءماسليحات دەپۋتاتتارىنا التىن توسبەلگى بەرىلمەيدى. ءبىراق سول كەزدە اكىمدىكتە ەكىباستۇزدىڭ بارلىق 17 دەپۋتاتىنا التىن توسبەلگى بەرىلدى. ءبىز وعان اقى تولەمەدىك. ءقازىر ول قاجەتسىز جاتىر. وعان قوسا بۇل توسبەلگىمەن بايلانىستى جاعىمسىز ەستەلىكتەر بار. سوندىقتان دا ونى ساتۋعا شىعاردىم»، – دەدى مارات جىلانبايەۆ.

ەسكە سالا كەتسەك، ول - الەمدەگى ەڭ ءىرى شولدەردى جالعىز ءوزى جۇگىرىپ وتكەن جالعىز سپورتشى. ول قاراقۇم، ساحارا، ۇلكەن ۆيكتوريا، نيەۆادا سياقتى شولدەردى ەڭسەرىپ، گيننەستىڭ كىتابىنا ەنگەن، الەم بويىنشا جەتى رەكورد ورناتقان. جىلانبايەۆ جەر بەتىندەگى ەڭ مىقتى جانە ەڭ شىدامدى ادام دەپ تانىلدى. 1995 جىلى ول ۇلكەن سپورتتى تاستاپ، قوعامدىق قىزمەتپەن اينالىستى.