ارميا كەز كەلگەن مىندەتتى ورىنداۋعا قابىلەتتى بولۋى ءتيىس.
قازاق ارمياسىنا جاڭا تالاپتار قويىلىپ جاتىر. اسكەرگە قويىلاتىن جاڭا تالاپتار تۋرالى قورعانىس ءمينيسترى نۇرلان ەرمەكبايەۆ اتالمىش ۆەدومستۆودا وتكەن اپپاراتتىق كەڭەستە ايتتى، دەپ حابارلايدى Almaty-akshamy.kz.
«قورعانىس مينيسترلىگىندە بولىپ وتكەن كەزەكتى اپپاراتتىق كەڭەستە بەيبىت ۋاقىتتا حالىقتىڭ ءومىرى مەن دەنساۋلىعىن قورعاۋ، توتەنشە جاعدايلاردى جويۋعا قولداۋ كورسەتۋ ءۇشىن قولدانىلۋى مۇمكىن كۇشتەر مەن قۇرالداردى جەتىلدىرۋ بويىنشا مىندەتتەر قويىلدى»، – دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
پاندەميا كەزەڭىندە «قوس ماقساتتاعى كومپونەنتتەردىڭ» وتە قاجەت ەكەنى ءىس جۇزىندە دالەلدەندى. الەمدە ورىن العان سوڭعى وقيعالار – ءورت شىعۋ، سۋ باسۋ، تابيعي ءزىلزالا اياسىندا ولاردىڭ وزەكتى بولىپ تابىلاتىنى راستالدى.
مامانداندىرىلعان اسكەري-دالالىق، ونىڭ ىشىندە ينفەكسيالىق بەيىندەگى مەديسينالىق مەكەمەلەردىڭ مۇمكىندىگىن كەڭەيتۋ تاپسىرىلدى.
ءورت سوندىرۋگە ارنالعان مۇمكىندىكتەردى جەتىلدىرىپ، ولاردى كوبەيتۋگە تاپسىرمالار بەرىلدى.
اسكەري-تەڭىز كۇشتەرى ۇدايى ءجۇزۋ قۇرالدارىن، سونىمەن قاتار راديولوكاسيالىق جابدىقتى تارتۋ ارقىلى ىزدەۋ-قۇتقارۋ جۇمىستارىنا قاتىسۋدى ءىس جۇزىندە پىسىقتاۋى ءتيىس.
سونىمەن قاتار، بروندى تانك تەحنيكاسىن قىسقى ۋاقىتتا قار تازالاۋ جۇمىسىندا قولدانۋ جانە ول ءۇشىن جوندەۋمەن اينالىساتىن اسكەري بولىمدەر، سەحتار، بولىمشەلەر كۇشتەرىمەن ارنايى جابدىق جاساۋ ماسەلەسىن پىسىقتاۋعا نۇسقاۋ بەرىلدى.
«ارميا ءارقاشان كەز كەلگەن قيىندىقتى ەڭسەرۋگە، كەز كەلگەن مىندەتتى ورىنداۋعا قابىلەتتى بولۋى ءتيىس»، – دەدى قورعانىس ءمينيسترى.