«قازاقستاندىق-امەريكالىق قارىم-قاتىناستارعا وتىز جىل: قاڭتار داعدارىسى جانە بولاشاققا جول»
وسى تاقىرىپ اقش-تىڭ جەتەكشى ساراپتاما ورتالىقتارىنىڭ ءبىرى سانالاتىن اتلانتيكالىق كەڭەس الاڭىندا پانەلدىك پىكىرتالاسقا وزەك بولدى. جيىندا قازاقستاننىڭ قاڭتار وقيعاسىنان كەيىنگى ساياسي جانە ەكونوميكالىق رەفورمالارى جانە قوس ەل اراسىنداعى كەڭەيتىلگەن ستراتەگيالىق ارىپتەستىكتى ودان ءارى دامىتۋدىڭ ماڭىزدىلىعى تالقىلاندى، دەپ حابارلايدى Almaty-akshamy.kz
قاتىسۋشىلار قازاقستاننىڭ عالامدىق تۇراقتىلىق پەن قاۋىپسىزدىكتى قامتاماسىز ەتۋگە قوسقان ەلەۋلى ۇلەسىن اتاپ ءوتتى. ال قازاقستاننىڭ ەلشىسى پانەلگە قاتىسۋشىلارعا قاڭتار وقيعالارىنىڭ تۇپكى سەبەپتەرىن جويۋ بويىنشا اتقارىلىپ جاتقان شارالارى تۋرالى باياندادى. اتلانتيكالىق كەڭەستىڭ ساراپشىلارى قازاقستان مەن اقش اراسىنداعى ارىپتەستىكتىڭ نىعايا تۇسەرىنە سەنىم ءبىلدىردى.
«مەن جىلدار بويى «اقش-تىڭ ورتالىق ازياداعى نەگىزگى سەرىكتەستەرىنىڭ ءبىرى – قازاقستان» دەپ ايتىپ كەلەمىن. ءقازىر مۇنىڭ وزەكتىلىگى ءتىپتى ارتا ءتۇستى. الداعى ۋاقىتتا اقش-تىڭ جوعارى رەسمي وكىلدەرىن قازاقستانعا جىبەرىپ، قازاقستاننىڭ وكىلدەرىن ۆاشينگتونعا شاقىرىپ، وسىلايشا ارىپتەستىكتى ارتتىرۋىمىز قاجەت. قازاقستان ورتالىق ازياداعى تۇراقتاندىرۋشى جانە تەڭگەرۋشى ءرولىن اتقارىپ كەلەدى. سونداي-اق ءوزىنىڭ تيىمدىلىگىن دالەلدەگەن كوپۆەكتورلى سىرتقى ساياساتىن ءساتتى جۇزەگە اسىرۋدا»، - دەدى اتلانتيكالىق كەڭەس ەۋرازيالىق ورتالىعىنىڭ ديرەكتورى دجون حەربست.