ازياداعى ءوزارا ءىس-قيمىل جانە سەنىم شارالارى كەڭەسىنىڭ (اوسشك) 7ء-شى سىرتقى ىستەر مينيسترلەرىنىڭ وتىرىسى ونلاين فورماتتا ءوتتى.
ونىڭ بارىسىندا قازاقستان رەسپۋبليكاسى ۇيىمداعى ءتوراعالىعىن رەسمي تۇردە ازەربايجان رەسپۋبليكاسىنا تاپسىردى، دەپ حابارلايدى aqshamnews.kz ءسىم سايتىنا سىلتەمە جاساپ.
ءىس-شارا بارىسىندا ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ قازاقستاننىڭ ءتوراعالىعى كەزىندەگى اوسشك-تىڭ نەگىزگى جەتىستىكتەرىن اتاپ ءوتىپ، ۇيىمنىڭ ءتورت جىلدىق جۇمىسىن قورىتىندىلادى.
اتاپ ايتقاندا، 2022 جىلعى قازاندا استانادا وتكەن اوسشك 6-شى ءسامميتىنىڭ قورىتىندىسى بويىنشا ىسكە قوسىلعان ترانسفورماسيا ۇدەرىسىنە ەرەكشە نازار اۋدارىلدى. 2023 جىلعى قىركۇيەكتە قابىلدانعان ترانسفورماسيا جونىندەگى جول كارتاسىنا سايكەس، قازاقستان ءتوراعالىعى كەڭەس جارعىسىنىڭ جوباسىن ازىرلەپ، كەلىستىرۋ ۇدەرىسىن باستادى. اتالعان كەزەڭدە قازاقستان تالداۋ ورتالىقتار فورۋمى، دانالار كەڭەسى جانە اوسشك قورى سياقتى ءۇش جاڭا ورگاننىڭ اشىلۋىنا باستاماشىلىق ەتتى.
سونىمەن قاتار، م. نۇرتىلەۋ ءوز سوزىندە وڭىرلىك ترانزيت-كولىكتىك ءوزارا بايلانىس، اقپاراتتىق-كوممۋنيكاسيالىق تەحنولوگيالاردى دامىتۋ جانە كليماتتىڭ وزگەرۋى ماسەلەلەرى بويىنشا قازاقستان رەسپۋبليكاسىنىڭ سىرتقى ساياسي باسىمدىقتارىن اتاپ ءوتتى.
مينيستر قازاقستان اوسشك-تىڭ بۇدان ءارى دامۋىنا بەيىلدى ەكەنىن راستاپ، ونىڭ بىرەگەي فورماتى مەن گەوگرافياسىن ەسكەرە وتىرىپ، كەڭەستىڭ ەلەۋلى پەرسپەكتيۆالارى مەن زور بولاشاعىنا سەنىم ءبىلدىردى.
وتىرىس بارىسىندا قاتىسۋشىلار مۇشە مەملەكەتتەر اراسىنداعى قاتىناستاردى رەتتەيتىن قاعيداتتار دەكلاراسياسىنىڭ 25-جىلدىعى تۋرالى مالىمدەمە، سەنىم شارالارىن جۇزەگە اسىرۋ مودالدىلىگى تۋرالى شەشىم، سەنىم شارالارىنىڭ جاڭارتىلعان كاتالوگى سياقتى ءبىرقاتار قۇجاتتاردى قابىلدادى. سونداي-اق اوسشك مۇشە مەملەكەتتەردىڭ جەتەكشى ۋنيۆەرسيتەتتەرىنىڭ سەرىكتەستىك جەلىسىن ىسكە قوستى.
ءىس-شارا قورىتىندىسى بويىنشا مۇشە مەملەكەتتەر اوسشك-تەگى قازاقستاندىق ءتوراعالىقتىڭ جۇمىسىنا جوعارى باعا بەرىپ، كەڭەستى ينستيتۋتتاندىرۋداعى ايتارلىقتاي جەتىستىكتەرىن اتاپ ءوتتى.
ءىس-شاراعا ازەربايجان، جۇڭگو، پاكىستان، بانگلادەش، شري-لانكا، تاجىكستان، وزبەكستان جانە باسقا دا مۇشە مەملەكەتتەر مەن بايقاۋشى ەلدەردىڭ سىرتقى ساياسي ۆەدومستۆولارى باسشىلارى، سونىمەن قاتار بۇۇ، حالىقارالىق كوشى-قون ۇيىمى، اراب مەملەكەتتەرى ليگاسى، تۇركپا، ەكونوميكالىق ىنتىماقتاستىق ۇيىمى، شىۇ، ەەك جانە بۇۇ-نىڭ ەسىرتكى جانە قىلمىس جونىندەگى باسقارماسى سياقتى 9 حالىقارالىق ۇيىمنىڭ وكىلدەرى قاتىستى.