قازاقستان امۋر جولبارىسىن جەرسىندىرۋ ءۇشىن دايىندالىپ جاتىر

وسى ماقساتتا بالقاش كولىنىڭ اۋماعىندا 415 مىڭ گەكتاردى قۇرايتىن ەرەكشە قورعالاتىن تابيعي اۋماق قۇرىلعان.

قازاقستان امۋر جولبارىسىن جەرسىندىرۋ ءۇشىن دايىندالىپ جاتىر. بۇل تۋرالى ۆلاديۆوستوكتا شىعىس ەكونوميكالىق فورۋمى اياسىندا ءوتىپ جاتقان جولبارىستاردى قورعاۋ جونىندەگى II حالىقارالىق فورۋمدا قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ۆيسە-مينيسترى ءاليا شالابەكوۆا ءمالىم ەتتى، دەپ حابارلايدى Almaty-akshamy.kz Inbusiness.kz سىلتەمە جاساپ.

«ءبىز بيوالۋانتۇرلىلىكتى ساقتاۋ جونىندەگى كونۆەنسياعا قاتىسۋشى مەملەكەت رەتىندە ەكوجۇيەنى ساقتاۋ مەن قالپىنا كەلتىرۋگە قامقورلىق جاسايمىز. وتكەن عاسىردىڭ ورتاسىندا تۇران جولبارىسى قازاقستان اۋماعىندا مەكەندەگەنىن ەسكەرە وتىرىپ، جولبارىستى جەرسىندىرۋ تۋرالى شەشىم قابىلداندى. 2025 جىلعا قاراي قازاقستان ۇكىمەتى رەينترودۋكسياعا العاشقى قادام جاسايدى دەپ ۇمىتتەنەمىز»، – دەدى ۆيسە-مينيستر.

ونىڭ ايتۋىنشا، گەنەتيكالىق زەرتتەۋلەر تۇران جولبارىسىنىڭ دنق بويىنشا امۋر جولبارىسىنا ەڭ جاقىن ەكەنىن كورسەتتى. 2010 جىلدان بەرى رەسپۋبليكادا جولبارىستى قايتا جەرسىندىرۋ باعدارلاماسى ازىرلەنۋدە. قازىرگى ۋاقىتتا قازاقستان رەسپۋبليكاسىنىڭ ۇكىمەتى بالقاش كولىنىڭ اۋماعىندا 415 مىڭ گەكتاردى قۇرايتىن ەرەكشە قورعالاتىن تابيعي اۋماق قۇردى. مۇندا 64 قىزمەتكەر جۇمىس ىستەيدى.