39 پرەپارات ساتىپ الىندى، ونىڭ 9-ى العاش رەت قازاقستاندا ساتىپ الىندى، ونىڭ ىشىندە الەمدەگى ەڭ قىمبات «زولگەنسما» پرەپاراتى بار. ساتىپ الۋدىڭ جالپى سوماسى 31،6 ملرد تەڭگەنى قۇرادى. احوندروپلازيامەن اۋىراتىن 10 بالا سۇيەكتىڭ ءوسۋىن ىقپال ەتەتىن يننوۆاسيالىق ۆوكسسوگو (ۆوسوريتيد) پرەپاراتىن قابىلداۋدى باستادى.



«اتاۋلى كومەك كورسەتۋ بويىنشا كەڭەيتىلگەن تاسىلدەر مەن الگوريتمدەردى ەنگىزۋ اياسىندا 25 پاسيەنت شەتەلگە ەمدەلۋگە جىبەرىلدى، وعان 460 ملن تەڭگە جۇمسالدى. شەتەلگە ءبىز باس مەديسينالىق ۇيىمداردىڭ قانداي دا ءبىر باعىتتار بويىنشا قورىتىندىلارى بار ەرەكشە جاعدايلاردا جىبەرەمىز. بىرىنشىدەن، بۇل اۋرۋلار ءبىزدىڭ ەلدە ەمدەلمەۋى ءتيىس. ەكىنشىدەن، ەگەر ەمدەلمەسە جانە بيۋدجەتتەن قاراجات الا الماسا. ونكولوگيالىق ناۋقاستاردان شەتەلدە ەمدەۋ بويىنشا وتىنىشتەر وتە كوپ»، – دەپ اتاپ ءوتتى سپيكەر.



سونداي-اق 13 ايماقتاعى 28 مەديسينالىق ۇيىمعا وفتالمولوگيالىق سكرينينگكە، شالا تۋىلعان نارەستەلەردىڭ رەتينوپاتياسىن ەمدەۋگە ارنالعان جابدىقتار جەتكىزىلدى. بۇل دامىماعان كورۋ ورگاندارىن ەرتە انىقتاۋعا جانە ەمدەۋگە، بالالاردىڭ مۇگەدەكتىگىن بولدىرماۋعا مۇمكىندىك بەرەدى.


س. د. اسفەندياروۆ اتىنداعى قازۇمۋ ۋنيۆەرسيتەتتىك كلينيكاسىندا 2023- جىلدىڭ مامىرىنان جەلتوقسانىنا دەيىن ءمۇيىزدى قابىقتى ترانسپلانتاسيالاۋ بويىنشا 93 وتا جاسالدى. شۇعىل قاساڭ قابىقتى ترانسپلانتاسيالاۋدى قاجەت ەتەتىن 304 پاسيەنت ترانسپلانتاسيا ارقىلى كورۋ قابىلەتىن قالپىنا كەلتىرە الدى. قازاقستاندا دونورلىق ماتەريالدىڭ تاپشىلىعىنا بايلانىستى قاساڭ قابىقتاردى تاسىمالداۋ اقش-تان جۇزەگە اسىرىلادى. جوبانىڭ بيۋدجەتى -374 ملن تەڭگە.



«دارىگەرلەر قوردىڭ اقشاسى قاجەت ەمەس دەيدى. ءبىزدىڭ ەلدە ءمايىت دونورلىعى قايتادان ىسكە قوسىلۋى ءۇشىن زاڭدى وزگەرتۋ كەرەك. ءبىز ۇكىمەت پەن جۇرتشىلىقتى ترانسپلانتاسيا، ءمايىت دونورلىعى تۋرالى زاڭنىڭ وزگەرۋىنە يتەرمەلەۋ ءۇشىن دەنساۋلىق ساقتاۋ مينيسترلىگىمەن بىرلەسىپ ءتيىستى كونفەرەنسيا وتكىزدىك. ءبىزدىڭ ەل وسىعان بايلانىستى رەيتينگتىڭ ەڭ تومەنگى دەڭگەيىنە ءتۇسىپ كەتتى. 4 مىڭ ادامعا اعزالاردى شۇعىل ترانسپلانتاسيالاۋ قاجەت»، – دەپ تۇيىندەدى سپيكەر.