ەكىجاقتى كەزدەسۋ جاپونيادا ءوتتى
قازاقستان جاپونيادا وتەتىن EXPO كورمەسىنە قاتىسادى، دەپ حابارلايدى Almaty-akshamy.kz.
Azattyq Ruhy-نىڭ مالىمەتىنە سۇيەنسەك، «QazExpoCongress» ۇك» اق باسشىلىعى EXPO 2025 Osaka ۇيىمداستىرۋ كوميتەتىنىڭ وكىلدەرىمەن كەزدەسىپ، قازاقستاننىڭ كورمەگە قاتىسۋ شارتىنا قول قويىلدى. قازاقستان تاراپىنان شارتقا ۇلتتىق سەكسيانىڭ باس كوميسسارى داۋلەت ەركىمبايەۆ، جاپونيا تاراپىنان قاۋىمداستىقتىڭ باس حاتشىسى Hiroyuki Ishige، EXPO 2025 Osaka دۇنيەجۇزىلىك كورمەسىنىڭ باس كوميسسارى Koji Haneda قول قويدى.
«جاپونيادا وتەتىن EXPO 2025 كورمەسىنە دايىندىقتى باستاپ كەتتىك. ۇيىمداستىرۋ ىسىنە قاتىستى بارلىق سۇراق پەن «ومىرلەردى قۇتقارۋ» تاقىرىپتىق كلاستەرىندە ورنالاساتىن پاۆيلونىمىزدى تولىق پىسىقتاۋدامىز. كورمەنىڭ باستالۋىنا ەكى جىل بار، ءبىراق ءىس جۇزىندە از ۋاقىت قالدى. كورمە 2025 جىلدىڭ 13 ساۋىرىندە اشىلىپ، 13 قازانىندا اياقتالادى. ۇيىمداستىرۋشىلاردىڭ بولجامى بويىنشا، كورمەگە الەمنىڭ 150 ەلىنەن 28 ميلليوننان استام ادام كەلۋى ءتيىس، سونداي-اق 25 حالىقارالىق ۇيىم وكىلدەرىنىڭ قاتىسۋى بولجانادى»، – دەدى ەركىمبايەۆ.
EXPO-2025 جاپونيانىڭ وساكاداعى يۋمەشيما جاساندى ارالىندا وتەدى. كورمەنىڭ تاقىرىبى «ءبىزدىڭ ءومىرىمىز ءۇشىن بولاشاق قوعامىن قۇرۋ» دەپ اتالادى. ول قوسىمشا تاعى ءۇش تاقىرىپشادان تۇرادى: «ومىرلەردى قۇتقارۋ»، «قۇقىق مەن مۇمكىندىكتەردى كەڭەيتۋ» جانە «ومىرلەردى بىرىكتىرۋ». كورمەنىڭ جالپى اۋدانى شامامەن 155 گا قۇرايدى. قازاقستان پاۆيلونى يتاليا، نيدەرلاند، سينگاپۋر جانە بولگاريا پاۆيلوندارىمەن كورشىلەس ورنالاساتىن بولدى.