"QazaqGaz" اق ەلىمىزدىڭ نەگىزگى گاز كومپانياسى سانالادى.
حيۋستوندا ءوتىپ جاتقان CERAWeek حالىقارالىق ەنەرگەتيكالىق كونفەرەنسياسى اياسىندا QazaqGaz باسشىسى سانجار جاركەشوۆ ۇلتتىق گاز كومپانياسىنىڭ IPO-عا شىعۋ جوسپارى تۋرالى ايتتى، دەپ حابارلايدى Almaty-akshamy.kz
ريا نوۆوستي اقپارات اگەنتتىگىنىڭ حابارلاۋىنشا، جاركەشوۆ كومپانيانىڭ 2025 جىلعا قاراي اكسيالاردى العاش رەت جاريا ورنالاستىرۋ جوسپارىن راستادى.
"2025 جىلعا نەمەسە سول مەرزىمگە قاراي IPO-عا دايىندالىپ جاتقان جاڭا ۇلتتىق كومپانيا رەتىندە ءبىز ESG-گە كوپ كوڭىل بولەمىز"، - دەدى ول.
ESG (environment، social، governance) "ەكولوگيا، الەۋمەتتىك ساياسات جانە كورپوراتيۆتىك باسقارۋ" دەگەندى بىلدىرەدى. كەڭ ماعىنادا بۇل قورشاعان ورتاعا قامقورلىقپەن قاراۋ، جوعارى الەۋمەتتىك جاۋاپكەرشىلىك جانە ساپالى كورپوراتيۆتىك باسقارۋ پرينسيپتەرىنە نەگىزدەلگەن كوممەرسيالىق قىزمەتتىڭ تۇراقتى دامۋى.
ESG قاعيداتتارىن قازىرگى ماعىناسىندا العاش رەت بۇۇ-نىڭ بۇرىنعى باس حاتشىسى كوفي اننان بەكىتكەن. ول ءىرى الەمدىك كومپانيالاردىڭ باسشىلىعىنا ەڭ الدىمەن كليماتتىڭ وزگەرۋىنە قارسى تۇرۋ ءۇشىن وسى پرينسيپتەردى ءوز ستراتەگيالارىنا قوسۋدى ۇسىندى.