بۇل تۋرالى كينوستۋديا ۇجىمىمەن باسشىلىقتىڭ كەزەكتى جينالىسىندا ايتىلدى.
كەزدەسۋدە «قازاقفيلم» كينوستۋدياسىنىڭ ۇيىمداستىرۋ قۇرىلىمى مەن ەڭبەكاقى تولەۋ تەتىگىنىڭ جوباسىن ازىرلەۋ جونىندەگى قىزمەتكەرلەر مەن جۇمىس بەرۋشى وكىلدەرى كوميسسياسىنىڭ قورىتىندىسى شىعارىلدى، دەپ حابارلايدى Almaty-akshamy.kz.
كينوستۋديا پرەزيدەنتى اقان ساتايەۆتىڭ ايتۋىنشا، قازىرگى ۋاقىتتا ارنايى كوميسسيا دامۋ ۆەكتورلارىن، ەڭبەكاقى تولەۋدى قالىپتاستىرۋ پرينسيپتەرىن جانە ۇيىمداستىرۋ قۇرىلىمىن انىقتالدى. ۇيىمنىڭ شتاتتىق قۇرامى مەن سانى قالىپتاستىرىلدى.
«سىزدەردى جاقسى جاڭالىقپەن قۋانتقىم كەلەدى. 1 قىركۇيەكتەن باستاپ جالپى كينوستۋديا بويىنشا قىزمەتكەرلەردىڭ جالاقىسى ورتا ەسەپپەن 30%-عا وسەدى. مادەنيەت مينيسترلىگى تاراپىنان، پيچينگتە ءوز جوبالارىن قورعاعان اۆتورلار تاراپىنان ۇلكەن قولداۋ كورسەتىلدى. ءبىز جالاقىنى كوتەردىك جانە وسىمەن شەكتەلمەيمىز دەپ ۇمىتتەنەمىن. وسى ورايدا ستۋديانىڭ جەتىستىگى ءارقايسىمىزعا بايلانىستى ەكەنىن اتاپ وتكىم كەلەدى. سوندىقتان سىزدەردى ءارى قاراي دا جاۋاپتى بولۋعا جانە جاقسى جۇمىس ىستەۋگە شاقىرامىن»، - دەدى ا.ساتايەۆ.
كەزدەسۋ بارىسىندا كينوستۋديانىڭ سەنارييلىك-رەداكسيالىق القا جۇمىسى بارىنشا قولعا الىناتىنى ايتىلدى.
ۇيىمداستىرۋ قۇرىلىمىن رەفورمالاۋدا باستى نازار سەنارييلىك-رەداكسيالىق القانىڭ جۇمىسىنا جانە وتاندىق كورەرمەندەر تالاپ ەتەتىن ساپالى فيلمدەر شىعارۋعا اۋدارىلادى. كينوستۋدياعا ارنالعان كلاسسيكالىق بولىمشەلەردەن باسقا قۇرىلىمعا عىلىمي-زەرتتەۋ كينولابوراتورياسى، كينوستۋديانىڭ سيفرلىق ترانسفورماسياسىنا جاۋاپ بەرەتىن باعدارلامالىق-تەحنيكالىق باسقارۋ جانە دامۋ ءبولىمى ەنگىزىلەدى. سونداي-اق، ماركەتينگ ءبولىمى مەن باسپا ءسوز قىزمەتىنىڭ جۇمىسىن كۇشەيتۋ جوسپارلانۋدا.
مەملەكەتتىك باعدارلامانى ىسكە اسىرۋ ماقساتىندا «قازاقانيماسيا» شىعارماشىلىق بىرلەستىگى قۇرىلادى. بۇگىندە كينوستۋديا «ۇلتتىق كينونى قولداۋ مەملەكەتتىك ورتالىعى» جۇرگىزگەن پيچينگ ناتيجەلەرى بويىنشا، سونداي-اق قۇقىعى «قازاقفيلمگە» تيەسىلى كلاسسيكالىق قازاقستاندىق كينو قورىن رەستاۆراسيالاۋ باعدارلاماسىن ىسكە قوسۋ بويىنشا جۇمىسقا كىرىستى.
كينوستۋديادا 2021 جىلى باستالعان بەلسەندى جاڭعىرتۋ باعدارلاماسى جالعاسۋدا. ينجەنەرلىك جەلىلەر مەن عيماراتتارعا تەحنيكالىق قايتا جاراقتاندىرۋ، كۇردەلى جوندەۋ جۇرگىزۋ، سونداي-اق ءتۇسىرىلىم پاۆيلوندارىن سالۋ كوزدەلەدى. اتالعان جۇمىستار كينوستۋديانى جاڭا حالىقارالىق دەڭگەيگە شىعارۋعا جانە ورتالىق ازيا وڭىرىندە جەتەكشى ورىنعا شىعۋعا مۇمكىندىك بەرمەك.
جاڭعىرتۋ اياسىندا ءۇش نەگىزگى عيماراتتا: پلەنكالى-زەرتحانالىق كەشەن، 2 پاۆيلوندى بلوك پەن تون-ستۋديادا جۇمىستار باستالدى. سونداي-اق، تاعى دا قوسىمشا ءۇش عيمارات سالۋ جوسپارلانۋدا. بۇل - ەكى پاۆيلوندى جانە ءبىر ۇلكەن قويما بلوگى. سونداي-اق، جازعى كينوتەاتر مەن مۇراجاي سالۋ مىندەتى دە قويىلعان. كينوستۋديانىڭ بارلىق ينفراقۇرىلىمى كەزەڭ-كەزەڭىمەن جاڭارتىلادى.