"قازاقفيلم" كينوستۋدياسى گولليۆۋد فيلمدەرىنىڭ ورنىنا ءساۋىر ايىنان باستاپ كينوتەاترلار پروكاتىنا قانداي فيلمدەر ۇسىناتىنى بەلگىلى بولدى.
ش.ايمانوۆ اتىنداعى «قازاقفيلم» اق 14 ساۋىردەن باستاپ دارەجان ومىربايەۆتىڭ «اقىن» اتتى جاڭا ءفيلمىن شەكتەۋلى پروكاتقا شىعارادى، دەپ حابارلايدى Almaty-akshamy.kz
بۇعان دەيىن اتالمىش كارتينا توكيودا وتكەن بەدەلدى حالىقارالىق كينوفەستيۆالدە «ۇزدىك رەجيسسەر» نوميناسياسى بويىنشا جۇلدەگەر اتانعان بولاتىن.
قازىرگى ۋاقىتتا كينوستۋديادا «ءبىزدىڭ سۇيىكتى دارىگەر-2» ءفيلمى ءتۇسىرىلىپ جاتىر. ايتا كەتەيىك، بۇل تۋىندىنىڭ اتاۋى «بىزگە دارىگەر كەرەك» بولىپ وزگەرتىلدى. جاقىن ۋاقىتتا قازاقستاندىق كورەرمەندەر ءۇشىن اقان ساتايەۆتىڭ «ۇلى دالا تاڭى» بلوكباستەرىنىڭ پرەمەراسى وتەدى. جوبا بۇرىن «قاسىم حان» دەگەن اتپەن تانىمال بولعان.
«بۇل ءبىزدىڭ ەلىمىزدىڭ تاريحىنداعى باستى تۇلعالاردىڭ ءبىرى – قاسىم حان تۋرالى اۋقىمدى حيكايا. اتى اڭىزعا اينالعان بيلەۋشى XV-XVI عاسىرلار ارالىعىندا قازاق حالقىنىڭ بوستاندىعى مەن تاۋەلسىزدىگى ءۇشىن كۇرەسكەن سيمۆولدىڭ بىرىنە اينالدى. ءدال وسى ۋاقىت ارالىعى كوبىنە قاسىم حاننىڭ ارقاسىندا ءبىزدىڭ مەملەكەتتىلىگىمىز بەن ۇلى قازاق دالاسىنىڭ گۇلدەنۋ كەزەڭى سانالادى. كوپتەن كۇتكەن جوبا 12 مامىردا جارىققا شىعادى»، - دەدى «قازاقفيلم» اق وكىلى كارىم قادىربايەۆ.
سونىمەن قاتار كينوستۋديادا الداعى ۋاقىتتا بولاتىن ۇلتتىق كينو ورتالىعىنىڭ پيچينگىنە دايىندىق ءجۇرىپ جاتىر. وسى جوباعا قاتىسۋ ءۇشىن قازاقفيلم كرەاتيۆتى يدەياسى بار جاس، تالانتتى اۆتورلاردى بىرلەسە ەڭبەك ەتۋگە شاقىرادى.
«قازاقفيلم» ەلىمىزدىڭ جالعىز مەملەكەتتىك كينوستۋدياسى رەتىندە كينەماتوگرافيستەر مەن كورەرمەندەردىڭ كەيىنگى بۋىنى الدىنداعى جاۋاپكەرشىلىگىن سەزىنە وتىرىپ، بىرلەسكەن جوبالاردى جۇزەگە اسىرۋدا جاس رەجيسسەرلەر مەن سەناريستەرگە تولىق كومەك كورسەتۋگە دايىن»، - دەدى سپيكەر.
ەسكە سالايىق، ق ر مادەنيەت جانە سپورت مينيسترلىگىندە ۆەدومستۆو باسشىسى داۋرەن ابايەۆتىڭ توراعالىعىمەن كينوپروكات نارىعىندا تانىلعان وتاندىق كومپانيالار باسشىلارىمەن كەڭەس ءوتتى. كەزدەسۋ كينويندۋستريانى دامىتۋ ماسەلەلەرىنە ارنالدى.